មន្រ្តីប៉ូលិសប៉ុស្តិ៍ដែលទះកំផ្លៀងស្ត្រីជិះម៉ូតូបញ្ច្រាស់ទិស ត្រូវបានផ្អាកការងារបណ្តោះអាសន្ន
សារព័ត៌មាន Cambodia News/
ភ្នំពេញ ៖ លោកអនុសេនីយ៍ទោ កៅ សំអុល មន្ត្រីប៉ុស្តិ៍នគរបាលរដ្ឋបាល ទួលស្វាយព្រៃទី១ ខណ្ឌចំការមន រាជធានីភ្នំពេញត្រូវបានផ្អាកការងារជាបណ្តោះអាសន្ន ។ មូលហេតុនៃការសម្រេចផ្អាកការងារមន្ត្រីនគរបាល ឋាន្តរស័ក្តិអនុសេនីយ៍ទោនេះ ដោយសារនគរបាលរូននេះ បញ្ចេញអាកប្បកិរិយា ឬពាក្យសម្តីគ្មានសីលធម៌ អមនុស្សធម៌ ខ្វះសុជីវធម៌ ដែលជាហេតុធ្វើឲ្យបាត់បង់កិត្តិយស សេចក្តីថ្លៃថ្នូររបស់នគរបាលជាតិ។
ក្នុងលិខិតបង្គាប់ការ ស្តីពី ការផ្អាកការងារបណ្តោះអាសន្ន មន្ត្រីនគរបាលជាតិ ចុះថ្ងៃទី២២ ខែឧសភា ឆ្នាំ២០១៨ លោកនាយឧត្តមសេនីយ៍ ជួន សុវណ្ណ សម្រេចថា សាម៉ីខ្លួន ត្រូវមកបង្ហាញមុខនៅការិយាល័យបុគ្គលិក រៀងរាល់ម៉ោងធ្វើការ ដើម្បីកែប្រែកំហុសឆ្លង និងរង់ចាំការសម្រេចជាថ្មី។ រីឯប្រាក់ខែរបស់ប៉ូលិសនេះ ត្រូវបង្វែ មកបើកជាសាច់ប្រាក់ឲ្យសាម៉ីខ្លួនរៀងរាល់ខែ។
យោងតាមការសង្ខេបសាច់រឿងដោយគេហទំព័រនគរបាលជាតិបានឲ្យដឹងថា ក្រុមនគរបាល ឈរជើងនៅកែងផ្សារអូឡាំពិក ដែលប្រើប្រាស់ហិង្សា ដោយទះកំផ្លៀង លើស្ត្រីម្នាក់ ជិះម៉ូតូបញ្ច្រាសទិស និងមិនពាក់មួកសុវត្ថិភាព។ សកម្មភាពនេះ ត្រូវបានគេថតបង្ហោះតាមហ្វេសប៊ុក កាលពីរសៀលថ្ងៃទី២១ ខែឧសភា ។
ប្រភពដដែលបន្តថានៅល្ងាចថ្ងៃទី២១ ខែឧសភា មន្ត្រីនគរបាលប៉ុស្តិ៍ ដែលទះកំផ្លៀងស្ត្រីអ្នកជិះម៉ូតូនោះ ត្រូវបានហៅទៅសាកសួរនៅស្នងការដ្ឋាននគរបាលរាជធានីភ្នំពេញ។ មន្ត្រីនគរបាលនោះ បានសុខចិត្តធ្វើលិខិតសុំទោសលើស្ត្រីអ្នកបើកបរម៉ូតូខុសច្បាប់នោះ៕
