ពលរដ្ឋខេត្តក្រចេះ១៩នាក់ មិនមានឆ្លងមេរោគកូវីដ១៩ នោះទេ
សារព័ត៌មាន Cambodia News/
សៀមរាប (១០ មីនា ២០២០) ៖ មន្ទីរសុខាភិបាលខេត្តក្រចេះ នៅថ្ងៃទី៩ ខែមីនា ឆ្នាំ២០២០ បានចេញសេចក្តីប្រកាសមួយ ដោយបញ្ជាក់ថា គិតមកដល់ត្រឹម ១៤:០០នាទី ថ្ងៃ៩ ខែមីនា ឆ្នាំ២០២០ប្រជាពលរដ្ឋនៅស្រុកសំបូរចំនួនសរុប ១៩នាក់ ក្នុងនោះមានសិស្សវិទ្យាល័យហ៊ុនសែនសម្ភៈបុរៈសំបូរ ចំនួន០៦នាក់ ដែលបានធ្វើដំណើរទៅកាន់ខេត្តសៀមរាបគ្មានអ្នកណាម្នាក់សង្ស័យកើតកូវីដ១៩ (Covid-19) ទេ។
ទន្ទឹមនឹងនេះ មន្ទីរសុខាភិបាលខេត្តក្រចេះ ក៏បានស្នើឱ្យអ្នកលេងបណ្តាញសង្គម សុំបញ្ឈប់ជាបន្ទាន់ ព័ត៌មានប្រឌិតមិនច្បាស់លាស់ ធ្វើឲ្យប្រជាពលរដ្ឋភ័យខ្លាច ច្របូកច្របល់ក្នុងសង្គម។
បើតាមមន្ទីរសុខាភិបាលខេត្តក្រចេះ គឺប្រជាពលរដ្ឋនៅស្រុកសំបូរចំនួនសរុប ១៩នាក់នោះ ក្នុងនោះមានសិស្សវិទ្យាល័យហ៊ុនសែនសម្ភៈបុរៈសំបូរ ៦នាក់ បានធ្វើដំណើរទៅកាន់ខេត្តសៀមរាប ដើម្បីជូនដំណើរពលករចំនួន ៣នាក់ ទៅធ្វើការនៅប្រទេសជប៉ុន កាលពីថ្ងៃទី៥ ខែមីនា ឆ្នាំ២០២០។
ពលករទាំង៣នាក់នោះ បានរៀនភាសាជប៉ុន នៅសាលាមួយដែលមានបុគ្គលិក ១នាក់ធ្វើការនៅក្នុងសាលានេះកើតជំងឺកូវីដ១៩ (Covid-19) ( បញ្ជាក់ដោយក្រសួងសុខាភិបាលកាលពីថ្ងៃទី៧ ខែមីនា ឆ្នាំ២០២០)។
តាមការប្រកាសរបស់មន្ទីរសុខាភិបាលខេត្តក្រចេះ ក្រុមមនុស្សទាំង១៩នាក់ខាងលើ មិនបានជួបជាមួយជនជាតិខ្មែរដែលមានជំងឺកូវីដ១៩ (Covid-19) នោះទេ និងមកដល់ពេលនេះ គាត់ទាំងអស់គ្នាមានសុខភាល្អជាធម្មតា គ្មានបញ្ហាសុខភាពអ្វីឡើយ៕
