នៅចុងឆ្នាំនេះភ្នំពេញ នឹងមានរោងចក្រអគ្គិសនី ប្រើដោយព្រះអាទិត្យ ៦០មេកាវ៉ាត់
សារព័ត៌មាន Cambodia News/
ភ្នំពេញ (៨ កក្កដា ២០១៩) ៖ ព្រឹទ្ធសភា នៃព្រះរាជាណាចក្រកម្ពុជា នឹងបើកកិច្ចប្រជុំពេញអង្គ នៅថ្ងៃទី១១ ខែកក្កដា ឆ្នាំ២០១៩ ខាងមុខនេះ ដើម្បីអនុម័តឲ្យក្រុមហ៊ុនចំនួន៣វិនិយោគ លើវិស័យអគ្គិសនី ប្រើប្រាស់ដោយថាមពលព្រះអាទិត្យ និងថ្ម ធ្យូងនៅកម្ពុជា ខណៈភ្លើងដែលប្រើប្រាស់ ដោយព្រះអាទិត្យ នឹងចាប់ផ្តើម ដំណើរការនៅរាជធានីភ្នំពេញ នាចុងឆ្នាំ២០១៩ នេះ ចំនួន៦០មេកាវ៉ាត់។
ថ្លែងប្រាប់អ្នកសារព័ត៌មានក្រោយពីកិច្ចប្រជុំ គណៈកម្មាធិការអចិន្ត្រៃយ៍នៅព្រឹទ្ធសភានាព្រឹកថ្ងៃទី៨ ខែកក្កដា នេះ ឯកឧត្តម ម៉ម ប៊ុននាង អ្នកនាំពាក្យ និងជាសមាជិកអចិន្ត្រៃយ៍ព្រឹទ្ធសភា បានឲ្យដឹងថា ស្របតាមសំណើរ របស់រាជរដ្ឋាភិបាលព្រឹទ្ធសភា នឹងបើកកិច្ចពេញអង្គរបស់ខ្លួន នៅពាក់កណ្តាលសប្តាហ៍នេះ ដើម្បីអនុម័ត លើរបៀបវារៈជាច្រើនដោយក្នុងនោះផ្តោតសំខាន់ លើការវិនិយោគរបស់ក្រុមហ៊ុន ផ្នែកវិស័យអគ្គិសនី។
ឯកឧត្តម បានបញ្ជាក់ថា នាពេលខាងមុខ ប្រទេសកម្ពុជា នឹងមានភ្លើងអគ្គិសនី ប្រើប្រាស់កាន់តែច្រើនក្រោយពីរាជរដ្ឋាភិបាលកម្ពុជា បានអនុញ្ញាតឲ្យក្រុមហ៊ុន ឯកជនវិនិយោគអគ្គិសនី ប្រើប្រាស់ដោយព្រះអាទិត្យ និងថ្មធ្យូង និងក្រោយ ទិញម៉ាស៊ីនភ្លើង ប្រើប្រាស់ដោយប្រេងខ្មៅ ពីបរទេសមកនោះ៕
