មួយខែ ជនជាតិស៊ីរី ៥០០០នាក់ស្លាប់ ជនភៀសខ្លួនស៊ីរីរងវិបត្តិជាប្រវត្តិសាស្ត្រ
ជនជាតិ ស៊ីរីដែលស្លាប់បាត់បង់ជីវិត បានកើនឡើងដល់៥០០០នាក់ ក្នុងមួយខែ។ ចំនួនអ្នកស្លាប់ដោយសារសង្គ្រាម ជាងពីរឆ្នាំមកនេះ កើនដល់ជិតមួយសែននាក់ហើយ។ ជនជាតិភៀសខ្លួនស៊ីរីនៅប្រទេសជិតខាង បានឡើងដល់មួយលានប្រាំបីសែននាក់។ នេះជាវិនាសកម្មដែលមិនធ្លាប់មាន ក្នុងរយៈពេលជិត២០ឆ្នាំមកនេះ គឺគិតចាប់ពីសម័យដែលប្រទេសរវ៉ាន់ដាបានរងនូវការសម្លាប់រង្គាល មក។ នេះបើយោងតាមអង្គការសហប្រជាជាតិ កាលពីថ្ងៃអង្គារម្សិលមិញនេះ ដែលបានផ្តល់តួលេខនៃចំនួនអ្នកស្លាប់នៅប្រទេសស៊ីរី។
អ្នកទទួល ខុសត្រូវនានានៅអង្គការសហប្រជាជាតិបានសុំអោយក្រុមប្រឹក្សា សន្តិសុខចាត់វិធានការអោយបានខ្លាំងក្លាដើម្បីដោះស្រាយវិបត្តិ សង្គ្រាមស៊ីរីដែលបានពន្យារពេលជាងពីរឆ្នាំមកនេះ។ ជនជាតិស៊ីរីដែលបានភៀសខ្លួនទៅប្រទេសជិតខាងដូចជាអ៊ីរ៉ាក់ ហ្សកដានី រឺក៏លីបង់ មានប្រហែល១លាន៨សែននាក់ ហើយ។ គឺជិតស្មើនឹងចំនួនជនភៀសខ្លួនរវ៉ាន់ដា ដែលរត់គេចពីការធ្វើឃាតរបស់ពួកហ៊ូទូ ក្នុងឆ្នាំ១៩៩៤។ កាលណោះ ចំនួនជនភៀសខ្លួនរវ៉ាន់ដា មានជាងពីរលាននាក់។
យោងតាមអង្គការសហប្រជាជាតិ ក្នុងវិបត្តិសង្គ្រាមនៅស៊ីរី កុមារទាំងឡាយត្រូវបានគេចាប់ឃុំ ធ្វើទារុណកម្មនិងសម្លាប់។ កុមារខ្លះត្រូវបានគេចាប់អោយធ្វើជាសកម្មជនប្រយុទ្ធសំរាប់ ក្រុមប្រឆាំងប្រដាប់អាវុធ។ មនុស្ស៤លាននាក់កំពុងត្រូវការជំនួយ។ ប៉ុន្តែ ដោយសារតែការរឹតបន្តឹងរបស់របបក្រុងដាម៉ាស និងក្រុមឧទ្ទាម អង្គការមនុស្សធម៌នានាមានការពិបាកចូលទៅជួយពួកគេណាស់។ មនុស្សប្រមាណ២៥០០នាក់ កំពុងជាប់ខ្លួននៅក្រុងហូម ដែលរដ្ឋាភិបាលស៊ីរីបានឡោមព័ទ្ធ តាំងពីខែមុនមក។ រដ្ឋាភិបាលស៊ីរីបានហាមក្រុមមនុស្សធម៌មិនអោយចូលទៅក្នុងក្រុង នេះ ដើម្បីជួយពួកគេឡើយ។
លោកស្រី Valerie Amos ទទួលបន្ទុកកិច្ចការមនុស្សធម៌នៃអង្គការសហប្រជាជាតិ បានប្រាប់ថា សព្វថ្ងៃនេះ ជំនួយមនុស្សធម៌សំរាប់ស៊ីរីនៅខ្វះទឹកប្រាក់ជាងបីពាន់លានដុល្លារ ទៀត។ លោកស្រី Amos បានអំពាវ នាវសហគមន៍អន្តរជាតិអោយប្រតិបត្តិការតាមព្រំដែន ដើម្បីអាចចូលទៅក្នុងទឹកដីស៊ីរី ជួយជនរង គ្រោះ។
តំណាងស៊ីរីនៅអង្គការសហប្រជាជាតិបានបដិសេធមិនទទួលស្គាល់តួលេខ អ្នកស្លាប់៥០០០នាក់ ក្នុងមួយខែនេះទេ។ ទោះយ៉ាងនេះក្តី តួលេខនិងវិបត្តិវិនាសកម្មនេះ អាចនឹងធ្វើអោយប្រទេសរុស្ស៊ីដែលគាំទ្ររដ្ឋាភិបាលលោកអាសាដ ធ្វើការពិចារណាពីគោលជំហរខ្លួនឡើងវិញ៕ដោយ ព្រំ សឿន សូលីណា (RFI)
