រថយន្តដឹកអ្នកដំណើរបែកកង់ក្រោយក្រឡាប់បណ្ដាលឱ្យមនុស្ស១២នាក់រងរបួស
សារព័ត៌មាន Cambodia News/
ព្រះសីហនុ (១២ ធ្មូ ២០១៧) ៖ រថយន្តដឹកអ្នកដំណើរប្រេភេទសាំយ៉ុងមួយគ្រឿងបានបែកកង់ក្រោយពេលកំពុងបើកបរក៏រេចង្កូតធ្លាក់ផ្លូវក្រឡាប់ទៅលើរបងវត្តបណ្ដាលឱ្យមនុស្សចំនួន១២នាក់រងរបួសធ្ងន់និងស្រាល។ហេតុការណ៍គ្រោះថ្នាក់ចរាចរណ៍បង្កដោយខ្លួនឯងនេះ បានកើតឡើងនៅតាមបណ្ដោយផ្លូវជាតិលេខ៤ចន្លោះគីឡូម៉ែត្រ១៧១-១៧២ ស្ថិតនៅក្នុងភូមិត្រពាំងគាឃុំជើងគោស្រុកព្រៃនប់ ខេត្តព្រះសីហនុកាលពីវេរសៀលថ្ងៃទី១១ ខែធ្នូ ឆ្នាំ២០១៧។
ប្រភពព័ត៌មានបានឱ្យដឹងថាមុនកើតហេតុគេឃើញរថយន្តម៉ាកសាំយ៉ុងមួយគ្រឿងពណ៌ស្លែពាក់ស្លាកលេខ ភ្នំពេញ 2AJ-1385 បើកបរដោយឈ្មោះ សៀង សិលា ភេទប្រុស អាយុ ២៥ឆ្នាំ មុខរបរ រត់តាក់ស៊ី មានទីលំនៅ ឃុំត្រពាំងអក ស្រុកកំពង់ត្របែក ខេត្តព្រៃវែង។ រថយន្តដឹកអ្នកដំណើរចំនួន ១២នាក់នេះបាន ធ្វើដំណើរមានទិសដៅពីខេត្តព្រះសីហនុ ឆ្ពោះទៅភ្នំពេញ។
លុះមកដល់ចំណុចកើតហេតុ រថយន្តបានបែកកង់ក្រោយខាងឆ្វេង ក៏រេចង្កូតទៅខាងស្តាំដៃធ្លាក់ផ្លូវក្រឡាប់ទៅរបងវត្តបារាយណ៍ តែម្តង ។ក្នុងនោះបណ្ដាលឲ្យមនុស្សទាំងចំនួន១២នាក់ នៅក្នុងរថយន្តរងរបួសធ្ងន់និងស្រាល ត្រូវបានបញ្ជូនទៅព្យាបាលនៅគ្លីនិក លិគឹមឌី វាលរេញ៕
