ផ្អាកលក់គ្រឿងស្រវឹងចំនួន២ថ្ងៃសម្រាប់ការបោះឆ្នោតឃុំ-សង្កាត់
សារព័ត៌មាន Cambodia News/
ភ្នំពេញ (០២ មិថុនា ២០១៧) ៖ សេចក្ដីណែនាំរបស់រាជរដ្ឋាភិបាលកម្ពុជាចុះហត្ថលេខាដោយលោកនាយករដ្ឋមន្ត្រី ហ៊ុន សែន កាលពីថ្ងៃ២៦ ខែឧសភា បានឲ្យដឹងថា ការស្នើឲ្យផ្អាកលក់គ្រឿងស្រវឹងនេះ មានបំណងធ្វើឲ្យដំណើរការបោះឆ្នោតជ្រើសរើសក្រុមប្រឹក្សាឃុំ-សង្កាត់ ដែលនឹងរៀបចំធ្វើនៅថ្ងៃទី៤ ខែមិថុនាខាងមុខ ប្រព្រឹត្តទៅដោយសេរី ត្រឹមត្រូវ និងយុត្តិធម៌ គ្មានអំពើហិង្សា គ្មានការគំរាមកំហែង គ្មានការបំភិតបំភ័យ និងបាតុភូតនានា ដែលអាចកើតមានឡើង ដោយសារតែការពិសាគ្រឿងស្រវឹងនោះ។
សេចក្ដីណែនាំបានសរសេរថា៖
«ប្រជាពលរដ្ឋខ្មែរ និងជនបរទេសទាំងអស់ ដែលរស់នៅក្នុងព្រះរាជាណាចក្រកម្ពុជា ត្រូវរួមសហការជាមួយរាជរដ្ឋាភិបាល កងកម្លាំងប្រដាប់អាវុធគ្រប់ប្រភេទ រដ្ឋបាលថ្នាក់ក្រោមជាតិគ្រប់លំដាប់ថ្នាក់ គណៈកម្មាធិការជាតិរៀបចំការបោះឆ្នោត និងគណៈកម្មការរៀបចំការបោះឆ្នោតគ្រប់លំដាប់ថ្នាក់ ពាណិជ្ជករ និងអាជីវករ ដោយត្រូវផ្អាកការលក់ដូរ និងពិសាគ្រឿងស្រវឹងមួយថ្ងៃ មុនថ្ងៃបោះឆ្នោត និងថ្ងៃបោះឆ្នោត»។
អ្នកលក់ដូរគ្រឿងស្រវឹងនៅរាជធានីភ្នំពេញនិយាយថា ពួកគេនឹងអនុវត្តតាមការណែនាំរបស់អាជ្ញាធរ ដើម្បីញ៉ាំងឲ្យការបោះឆ្នោតប្រព្រឹត្តទៅក្នុងបរិយាកាសមួយដែលមានការយោគយល់គ្នា និងការទទួលខុសត្រូវ៕
