បញ្ជីឈ្មោះបេក្ខជនតំណាងរាស្ត្របក្សសង្រ្គោះជាតិមានបញ្ហា
Cambodia News
ភ្នំពេញ៖ មន្ត្រីគ.ជ.ប បានបញ្ជាក់ថា នៅក្នុងបញ្ជីឈ្មោះបេក្ខជនតំណាងរាស្ត្ររបស់គណបក្សសង្គ្រោះជាតិ មានកំហុសថ្ងៃខែឆ្នាំកំណើត និងឈ្មោះរបស់បេក្ខជនខ្លះ ដែលនៅមិនទាន់អាចទទួលស្គាល់ជាផ្លូវការបាន ។
អគ្គលេខាធិការ នៃគណកម្មាធិការ គ.ជ.ប លោកទេព នីថា បានប្រាប់ប្រព័ន្ធផ្សព្វផ្សាយក្នុងស្រុកមួយថា បញ្ជីឈ្មោះរបស់គណបក្សសង្គ្រោះជាតិ ដែលបានដាក់ជូនគ.ជ.ប កាលពីថ្ងៃពីរសៀលថ្ងៃសុក្រកន្លងទៅ នៅមានការសរសេរថ្ងៃខែឆ្នាំកំណើតរបស់បេក្ខជនខុស ពោលគឺបេក្ខជនតែម្នាក់ មានលិខិតស្នាមផ្នែករដ្ឋបាល ដែលមានសរសេរថ្ងៃខែឆ្នាំកំណើតខុសគ្នា ហើយក៏មានកំហុសអក្ខរាវិរុទ្ធ នៃការសរសេរឈ្មោះបេក្ខជន ដែរ ។
លោកថា ករណីបែបនេះ បានកើតឡើងទៅលើឈ្មោះបេក្ខជនមួយចំនួននៃគណបក្សសង្គ្រោះជាតិ ហើយដែល គ.ជ. ប នឹងបញ្ជូនត្រឡប់ទៅគណបក្សនេះវិញ ដើម្បីធ្វើការកែតម្រូវអោយបានទាន់ពេល ។
ទាក់ទងនឹងកំហុសថ្ងៃខែឆ្នាំកំនើតរបស់បេក្ខជននេះ លោក ញ៉ែម ប៉ុញ្ញរិទ្ធ បានទទូចអោយ គជប ប្រញ៉ាប់ប្រញ៉ាល់ផ្ញើឈ្មោះបេក្ខជនដែល គជប បានរក ឃើញថាមានកំហុសថ្ងៃខែឆ្នាំកំណើតនោះ ដោយសារពួកគេនៅសល់ពេលវេលាតិច សំរាប់ការដាក់បញ្ជីនេះជូនគជប ជាថ្មី ។
យោងតាមប្រតិទិនរបស់ គជប កាលបរិច្ឆេទបិទឈប់ទទួល ការដាក់បញ្ជីបេក្ខជនតំណាងរាស្ត្រនៃការបោះឆ្នោតអាណត្តិទី៥ ជូន គជប គឺនៅវេលា ម៉ោង ៥.០០ ល្ងាច នៃថ្ងៃទី១៣ ខែឧសភា ឆ្នាំ២០១៣ ៕