មុនពេលបោះឆ្នោត លោកសមរង្ស៊ីព្យាយាមត្រឡប់ចូលស្រុកខ្មែរវិញ
នៅរសៀលថ្ងៃអង្គារ ទី១០ មករា ២០១២ មន្ត្រីជាន់ខ្ពស់គណបក្សសមរង្ស៊ី នឹងដឹកនាំគណប្រតិភូចូល ជួបពិភាក្សាជាមួយមន្ត្រីទូតសហរដ្ឋ អាមេរិកប្រចាំនៅកម្ពុជា។
ការជួបពិភាក្សានេះធ្វើឡើងដើម្បីស្វែងរកកិច្ចអន្តរាគមន៍សុំឲ្យលោក សម រង្ស៊ី បានវិលត្រឡប់ចូលមកស្រុកវិញ មុនពេលបោះឆ្នោតឃុំសង្កាត់ នៅខែមិថុនា ២០១២ និងបោះឆ្នោតតំណាងរាស្ត្រអាណត្តិទី៥ នៅឆ្នាំ២០១៣ ខាងមុខ។
លោក យឹម សុវណ្ណ អ្នកតំណាងរាស្ត្រ និងមន្ត្រីអ្នកនាំពាក្យគណបក្សសមរង្ស៊ីបាននិយាយថា ក្នុងកិច្ចពិភាក្សានេះ លោកនឹងលើកពីបញ្ហាប្រព័ន្ធយុត្តិធម៌នៅកម្ពុជា ដែលកំពុងស្ថិតនៅក្រោមសំពាធនយោបាយ បញ្ហាជម្លោះដីធ្លីដែលកំពុងកើតមានយ៉ាងអានាធិបតេយ្យ និងបញ្ហាការកែទម្រង់ច្បាប់ប្រឆាំងអំពើពុករលួយ៕
