គម្រងសាងសង់ ស្ពានអាកាស និងផ្លូវក្រោមដី ៤ខ្សែទៀតនៅក្បាលថ្នល់
សារប័ត៌មាន cambodia News/
ភ្នំពេញ (០៨ មិថុនា ២០១៦) ៖ ដោយមើលឃើញបញ្ហាកកស្ទះចរាចរណ៍ នៅតែកើតមាននៅតំបន់ស្ពានអាកាសក្បាលថ្នល់នោះ អាជ្ញាធរភ្នំពេញ មានគម្រោងស្ថាបនាស្ពានអាកាសចំនួន៣ និងផ្លូវក្រោមដី១ បន្ថែមទៀត ដើម្បីកែលំអរ និងដោះស្រាយបញ្ហាចរាចរឲ្យកាន់តែមានភាពរលូន ដូចស្ពានអាកាស និងផ្លូវក្រោមដីស្ទឹងមានជ័យតែម្តង ។
លោក ប៉ា សុជាតិវង្ស អភិបាលរាជធានីភ្នំពេញ បានលើកឡើងថា ចំពោះគម្រោងសាង់សង់ស្ពានអាកាស និងផ្លូវក្រោមដីក្បាលថ្នល់ ត្រូវតែចាប់ផ្តើមក្នុងពេលឆាប់ៗនេះ បើទោះបីជានៅមានបញ្ហាដែលជាឧបសគ្គស្មុគស្មាញមួយចំនួនក៏ដោយ ក៏ត្រូវចាប់ផ្តើមកន្លែងណាដែលមិនមានការប៉ះពាល់មុនតែម្តង ។
លោក ប៉ា សុជាតិវង្ស បានថ្លែងបែបនេះ នៅក្នុងកិច្ចប្រជុំនៅសាលារាជធានីភ្នំពេញ ដើម្បីពិភាក្សាលើគម្រោងស្ថាបនាផ្លូវក្រោមដីស្តុបកាណាឌីយ៉ា (BKC) និងពិនិត្យលទ្ធភាពចាប់ផ្តើមសាងសង់ស្ពានអាកាសចំនួន៤ខ្សែបន្ថែម នៅក្បាលថ្នល់ កាលពីពេលពីកន្លងមក។
មន្ត្រីជំនាញរបស់មន្ទីរសាធារណការ និងដឹកជញ្ជូនរាជធានីភ្នំពេញ បានឲ្យដឹងថា ស្ពានអាកាស និងផ្លូវក្រោមដីដែលសាលារាជធានីភ្នំពេញត្រៀមស្ថាបនានោះ មានចំនួន៤ គឺ ទី១-សង់ស្របពីលើមហាវិថីព្រះនរោត្តមបត់ឆ្វេងឡើងភ្ជាប់ទៅស្ពានព្រះមុនីវង្សថ្មី ទី២-តភ្ជាប់ពីស្ពានព្រះមុនីវង្សចាស់បត់កោងស្តាំឡើងទៅចាក់អង្រែ ទី៣-ហោះស្របពីលើមហាវិថីព្រះមុនីវង្សបត់ទៅនរោត្តម រួចបត់ស្តាំឡើងស្ពានវិញ និងទី៤-ផ្លូវក្រោមដី១ខ្សែទៀត ពីចាក់អង្រែទៅចេញនៅមហាវិថីព្រះមុនីវង្សតែម្តង ។
មន្ត្រីដដែលបន្តថា ចំពោះស្ពានអាកាសដែលហោះខាងលើនេះ មានបណ្តោយមិនស្មើគ្នានោះទេ គឺចាប់ពី២២០ទៅ២៤០ម៉ែត្រ ទទឹងចាប់ពី៥ទៅ៧ម៉ែត្រ ចំណែកផ្លូវក្រោមដីមានបណ្តោយ៣០៦ម៉ែត្រ ហើយបន្ទាប់ពីស្ថាបនារួច ការធ្វើចរាចរនៅតំបន់ស្ពានអាកាសក្បាលថ្នល់នឹងមានភាពប្រសើឡើង ៕
