គណបក្សសង្គ្រោះជាតិបដិសេធលទ្ធផលការបោះឆ្នោត
ភ្នំពេញ៖ កាលពីព្រឹកនាថ្ងៃទី២៩ ខែកក្កដា ឆ្នាំ លោក សម រង្ស៊ី និង និង កឹម សុខា ជាប្រធាន និងជាអនុប្រធានគណបក្សសង្គ្រោះជាតិ បានប្រកាសជាផ្លូវការហើយ នៅក្នុងសន្និសីទសារព័ត៌មាន បដិសេធមិនទទួលយកនូវលទ្ធផលការបោះឆ្នោតជ្រើសតាំងតំណងរាស្ដ្រ នីតិកាលទី៥ ដែលប្រកាសដោយគណៈកម្មាធិការជាតិរៀបចំការបោះឆ្នោត“គ.ជ.ប” ដោយគណបក្សសង្គ្រោះជាតិអះអាងថា បានរកឃើញនូវភាពមិនប្រក្រតីយ៉ាងធ្ងន់ធ្ងរជាច្រើន ។
សេចក្ដីថ្លែងការណ៍ដែលបានប្រកាសនៅថ្ងៃទី២៩ខែកក្កដាឆ្នាំ២០១៣នេះ របស់គណបក្សសង្គ្រោះជាតិ ក៏បានទាមទារឱ្យ មានការបង្កើតគណៈកម្មការចម្រុះមួយជាបន្ទាន់ ដើម្បីធ្វើការស៊ើបអង្កេត និងធ្វើរបាយការណ៍អំពីភាពមិនប្រក្រតីទាក់ទងនឹងការបោះឆ្នោត ។
គណៈកម្មការចម្រុះនេះអាចមានសមាសភាពចូលរួមពីគណបក្សសង្គ្រោះជាតិ គណបក្សប្រជាជនកម្ពុជា គ.ជ.ប តំណាងអង្គការសហប្រជាជាតិ តំណាងអង្គការសង្គមស៊ីវិលជាតិ-អន្ដរជាតិដែលធ្វើការងារពាក់ព័ន្ធ នឹងការបោះឆ្នោត ដោយគណៈកម្មការនេះត្រូវធ្វើការស៊ើបអង្កេត និងផ្ដល់របាយការណ៍ចុងក្រោយមិនឱ្យហួសពីថ្ងៃទី៣១ខែសីហាឆ្នាំ ២០១៣ឡើយ ៕ Cambodia News
