សម្តេចតេជោ ៖ ទោះបីមានភ្លៀង ក៏នៅតែបន្តចែកទឹកជូនប្រជាពលរដ្ឋ
សារព័ត៌មាន Cambodia News/
ភ្នំពេញ (២៣ ឧសភា ២០១៦) ៖ ក្នុងគណនីហ្វេសប៊ុកសម្ដេចតេជោ ហ៊ុន សែន នាយករដ្ឋមន្ត្រីកម្ពុជា បានសរសេរថា «ក្នុងប៉ុន្មានថ្ងៃនេះ ភ្លៀងបានចាប់ធ្លាក់នៅតាមបណ្តាខេត្តមួយចំនួន ហើយតម្រូវការទឹកគឺបានថយចុះជាបណ្តើរៗ។ តែប្រជាពលរដ្ឋយើងមួយចំនួនធំនៅខ្វះខាតទឹកប្រើប្រាស់នៅឡើយ។
ទន្ទឹមនឹងភ្លៀងចាប់ផ្តើមធ្លាក់ ក៏នៅមានបញ្ហាប្រឈមដូចជា ខ្យល់ព្យុះ ខ្យល់កន្រ្តាក់ ផ្គរ និងរន្ទះកើតឡើងដែលជាការព្រួយបារម្ភផងដែរ។ សូមផ្តល់ព័ត៌មានជូនបងប្អូនប្រជាពលរដ្ឋអោយបានទាន់សភាពការណ៌។
ខ្ញុំសូមរំលឹកនិងអំពាវនាវដល់អាជ្ញាធរមានសមត្ថកិច្ច និងសប្បុរសជន សូមបន្តជួយផ្តល់និងចែកចាយទឹកដល់បងប្អូនប្រជាពលរដ្ឋអោយបានគ្រប់ៗគ្នា។ សូមបន្តជីកនិងស្តារអណ្តូង ស្រះ ប្រឡាយ និងអាងស្តុកទឹកអោយបានលឿន ជាពិសេសសម្រាប់រក្សាទឹកទុកប្រើប្រាស់អោយបានខួបប្រាំងខួបវស្សាចៀសវាងការខ្វះខាតទឹកនៅពេលក្រោយៗទៀត។ សូមជួយជួសជុលផ្ទះជូនប្រជាពលរដ្ឋ និងជួសជុលសាលារៀនដើម្បីក្មួយៗមានសាលារៀនឡើងវិញទាន់ពេលវេលា។
ខ្ញុំសូមអរគុណសប្បុរសជន អាជ្ញាធរ និងក្រុមអ្នកស្ម័គ្រចិត្តទាំងអស់ រួមទាំងយុវជនដែលបានចូលរួមក្នុងយុទ្ឋនាការចែកចាយទឹកជូនបងប្អូនប្រជាពលរដ្ឋបានទាន់ពេលវេលា»៕
