អាកាសធាតុនឹងកើនកម្តៅចាប់ពីចុងខែកុម្ភៈ ខណៈភ្លៀងធ្លាក់តិច
សារព័ត៌មាន Cambodia News/
ភ្នំពេញ(១៨ កុម្ភៈ ២០១៤)៖ ក្រសួងធនធានទឹក និងឧតុនិយម ព្យាករណ៍អាកាសធាតុ រកឃើញថា សីតុណ្ហភាពក្នុងតំបន់ខ្ពង់រាប តំបន់ទំនាបកណ្តាល និងតំបន់មាត់សមុទ្រ នឹងកើនកម្តៅដល់ជាង៣០អង្សារ ចាប់ពីថ្ងៃទី២០ ខែកុម្ភៈ រហូតដល់ដើមខែឧសភា ខណៈដែលភ្លៀងកក់ខែ នឹងមានកម្រិតតិចជាងឆ្នាំ២០១៣។
សេចក្តីជូនដំណឹង ក្រសួងធនធានទឹក និងឧតុនិយម ចុះថ្ងៃទី១៧ ខែកុម្ភៈ ឆ្នាំ២០១៤នេះ បង្ហាញថា ស្ថានភាពសីតុណ្ហភាព សម្រាប់តំបន់ខ្ពង់រាបភាគឥសាន និងខ្ពង់រាបខាងជើង រួមមានខេត្តកំពង់ចាម ត្បូងឃ្មុំ ក្រចេះ ស្ទឹងត្រែង រតនគិរី ព្រះវិហារ និងខេត្តឧត្តរមានជ័យ សីតុណ្ហភាពអតិបរមា ចាប់ពីថ្ងៃទី២០ ខែកុម្ភៈ ដល់ខែមេសា មានពី ៣៣ ទៅ៣៥អង្សារ និងបន្តកើនដល់ ៣៧អង្សារ ដល់ខែឧសភា។
ចំពោះតំបន់ទំនាប កណ្តាល រួមមាន រាជធានីភ្នំពេញ ខេត្តកណ្តាល កំពង់ឆ្នាំង ពោធិ៍សាត់ បាត់ដំបង ប៉ៃលិន បន្ទាយមានជ័យ សៀមរាប កំពង់ធំ ព្រៃវែង ស្វាយរៀង តាកែវ និងខេត្តកំពង់ស្ពឺ សីតុណ្ហភាពអតិបរមា ចាប់ពីថ្ងៃទី២០ ខែកុម្ភៈ ដល់ខែមេសា មានពី ៣៣ ទៅ៣៦អង្សារ និងបន្តកើនដល់ ៣៨អង្សារ ដល់ខែឧសភា។
សម្រាប់ តំបន់មាត់សមុទ្រ ខេត្តកោះកុង ព្រះសីហនុ កំពត និងខេត្តកែប សីតុណ្ហភាពអតិបរមា ចាប់ពីថ្ងៃទី២០ ខែកុម្ភៈ ដល់ខែមេសា មានពី ២៩ ទៅ៣១អង្សារ និងបន្តកើនដល់ ៣៤អង្សារ ដល់ខែឧសភា។ ដោយឡែក ស្ថានភាពភ្លៀងកក់ខែ ក្នុងតំបន់នេះ គឺមានកម្រិតប្រហាក់ប្រហែលនឹងឆ្នាំ២០១៣៕