សហជីពសេរីកម្មករ ប្រារព្ធខួប១០ឆ្នាំសពលោក ជា វិជ្ជា នៅព្រឹកនេះ
សារព័ត៌មាន Cambodia News /
ភ្នំពេញ(២២ មករា ២០១៤)៖ នៅព្រឹកថ្ងៃទី២២ ខែមករានេះ សហជីពសេរីកម្មករកម្ពុជាបាន រៀបចំពិធីគោរពវិញ្ញាណក្ខន្ធសពលោក ជា វិជ្ជា គម្រប់១០ឆ្នាំ នៅផ្លូវច្រមុះជ្រូកខាងលិចវិមានឯករាជ្យ និងខាងត្បូងវត្តលង្ការ រាជធានីភ្នំពេញ។
ប្រធានសហជីពសេរីកម្មករកម្ពុជា លោក ជា មុនី បានឲ្យដឹងថា កម្មវិធីនេះ ចាប់ផ្ដើមនៅម៉ោង៨ព្រឹក ដោយមានអ្នកចូលរួមប្រមាណ១៥០នាក់ ហែក្បួនពីទីស្នាក់ការកណ្តាលរបស់សហជីព ស្ថិតក្នុងសង្កាត់បឹងកេងកងទី៣ ឆ្ពោះទៅកាន់រូបសំណាក់លោក ជា វិជ្ជា ស្ថិតនៅច្រមុះជ្រូកខាងលិចវិមានឯករាជ្យ និងខាងត្បូងវត្តលង្ការ។
-
សហជីពសេរីកម្មករ ប្រារព្ធខួប១០ឆ្នាំសពលោក ជា វិជ្ជា នៅព្រឹក នេះដែរ គេសង្កេតឃើញកម្លាំងសមត្ថកិច្ចចម្រុះជាច្រើននាក់ បានដាក់កម្លាំងការពារនៅក្បែរផ្ទះលោកនាយករដ្ឋមន្ត្រី ក្បែរវិមានឯករាជ្យ។
អ្នកនាំពាក្យសាលារាជធានីភ្នំពេញ លោក ឡុង ឌីម៉ង់ មានប្រសាសន៍ថា សាលារាជធានីភ្នំពេញ បានអនុញ្ញាតឲ្យ លោក ជា មុនី ប្រារព្ធខួប១០ឆ្នាំសពលោក ជា វិជ្ជា អតីតប្រធានសហជីពសេរីកម្មករនៃព្រះរាជាណាចក្រកម្ពុជា នៅមុខវត្តលង្ការ។
ប៉ុន្ដែហាមមិនឲ្យមានការហែក្បួនឡើយ ដោយខ្លាចប៉ះពាល់ដល់សន្តិសុខសណ្ដាប់ធ្នាប់ចរាចរណ៍ ឬបញ្ហាណាមួយកើតឡើងជាយថាហេតុ ប្រសិនបើសហជីពសេរីកម្មករ នៅតែប្រកាន់ជំហហែក្បួន នោះសាលារាជធានីភ្នំពេញ នឹងមានវិធានការទប់ស្កាត់។
លោក ជា វិជ្ជា អតីតប្រធានសហជីពសេរីកម្មករនៃព្រះរាជាណាចក្រកម្ពុជា ត្រូវបានខ្មាន់កាំភ្លើង មិនស្គាល់មុខ បាញ់ចំនួនបីគ្រាប់ បណ្តាលឲ្យដាច់ខ្យល់ស្លាប់ភ្លាមៗនៅនឹងកន្លែងកើតហេតុ ខណៈពេលដែលលោកកំពុងឤនសារព័ត៌មាន នៅមុខតូបលក់កាសែតមួយ ជាប់នឹងរបងវត្តលង្កា ស្ថិតក្នុងសង្កាត់បឹងកេងកង១ ខណ្ឌចំការមន រាជធានីភ្នំពេញ កាលពីព្រឹកថ្ងៃទី ២២ ខែមករា ឆ្នាំ២០០៤៕
