ទប់ស្កាត់ការឆ្លងថ្មីនៃមេរោគអេដស៍ក្នុងចំណោមកុមារ
ដោយ វត្តី
នៅឆ្នាំ ២០១៣ នេះ អង្គការសហប្រជាជាតិបានទទូចដល់ប្រទេសទាំងអស់ឲ្យបង្កើនសេវាកាន់តែច្រើនឡើងនិងមានប្រសិទ្ធភាពជាងមុន ដើម្បីជម្រុញការកាត់បន្ថយការឆ្លងមេរោគអេដស៍ពីម្តាយទៅកូន ក្នុងបំណងឈានទៅសម្រេចបានការមិនមានការឆ្លងថ្មីនៃមេរោគអេដស៍ក្នុងចំណោមកុមារ។
ដើម្បីសម្រេចបានលទ្ធផលនេះនាឆ្នាំ ២០១៥ បណ្តាប្រទេសជាសមាជិកនៃសហប្រជាជាតិ ត្រូវបង្កើនសេវាបន្ថែមដល់ស្រ្តីមានផ្ទៃពោះដែលកំពុងរស់នៅជាមួយមេរោគអេដស៍ (ស្រ្តីមានផ្ទៃពោះផ្ទុកមេរោគអេដស៍) ឲ្យបានរហូតដល់ ៩០%។
របាយការណ៍របស់អង្គការសហប្រជាជាតិប្រយុទ្ធនឹងជំងឺអេដស៍ (UNAIDS) ចេញផ្សាយនៅឆ្នាំ ២០១៣ នេះបានបង្ហាញថា កាលផ្តល់សេវាថែទាំសុខភាព សេវាព្យាបាលដោយថ្នាំប្រឆាំងមេរោគអេដស៍ និងធ្វើឲ្យសុខភាពបានល្អប្រសើរដល់ស្រ្តីមានផ្ទៃពោះដែលកំពុងរស់នៅជាមួយមេរោគអេដស៍នោះ គឺអាចជួយកាត់បន្ថយការឆ្លងថ្មីនៅក្នុងចំណោមកុមារបានដល់ទៅ ៩០%។
របាយការណ៍បានបញ្ជាក់ថា នៅត្រឹមខែធ្នូឆ្នាំ ២០១២ ស្រ្តីមានផ្ទៃពោះដែលកំពុងរស់នៅជាមួយមេរោគអេដស៍ជាង ៩០០.០០០ នាក់នៅក្នុងពីភពលោកបានទទួលការព្យាបាលដោយប្រើឱសថប្រឆាំងមេរោគអេដស៍ ហើយបង្ការការឆ្លងពីម្តាយទៅកូនបានកើនឡើងដល់ទៅ ៦៣% នៅឆ្នាំ ២០១២ បើប្រៀបធៀបឆ្នាំ ២០១១ មាន ៥៧%។
ទោះជាយ៉ាងនេះក្តី របាយការណ៍បានបង្ហាញថា មានតែប្រទេសបួនទេគឺ ប្រទេសបូស្វាណា ប្រទេសហ្គាណា និងប្រទេសហ្សមប៊ៀប៉ុណ្ណោះដែលបានសម្រេចក្នុងការផ្តល់ថ្នាំប្រឆាំងមេរោគអេដស៍ដល់ស្រ្តីមានផ្ទៃពោះដែលកំពុងរស់នៅជាមួយមេរោគអេដស៍បានដល់ទៅ ៩០%។
តាមរយៈនៃការពង្រីកសេវាបង្ការមេរោគអេដស៍នេះហើយ ទើបការឆ្លងដល់កុមារបានធ្លាក់មកនៅចំនួន ២៦០.០០០ នាក់ក្នុងឆ្នាំ ២០១២ នៅក្នុងប្រទេសដែលមានប្រាក់ចំណូលទាបនិងមធ្យម គឺបានធ្លាក់៣៥% បើធៀបនឹងឆ្នាំ ២០០៩។
អង្គការសហប្រជាជាតិបានទទូចឲ្យប្រទេសដែលមានប្រាក់ចំណូលទាបនិងមធ្យមបង្កើនការយកចិត្តទុកដាក់លើវិធីបង្ការមិនឲ្យមេរោគអេដស៍ឆ្លងពីម្តាយទៅកូន។ មានចំណុចបួនសំខាន់ក្នុងលុបបំបាត់ការឆ្លង គឺទីមួយបង្ការមិនឲ្យឆ្លងដល់ស្រ្តីពេញវ័យ (ស្រ្តីគ្រប់អាយុបន្តពូជ) ទីពីរជួយស្រ្តីដែលមានផ្ទុកមេរោគអេដស៍មិនឲ្យមានផ្ទៃពោះដែលខ្លួនមិនចង់បាន។
ទីបីគឺស្រ្តីមានផ្ទៃពោះហើយមានផ្ទុកមេរោគអេដស៍ទៀតត្រូវទទួលបានការប្រឹក្សាយោបល់ និងការពិនិត្យឈាមរកមេរោគអេដស៍ ហើយបើរកឃើញថាមានគឺត្រូវទទួលបានថ្នាំប្រឆាំងមេរោគអេដស៍ដើម្បីបង្ការការឆ្លងក្នុងអំឡុងពេលពរពោះ ពេលស្រាល និងពេលបំបៅដោះ ហើយទីបួនគឺផ្តល់ការថែទាំង ការព្យាបាល និងការគាំទ្រដល់ស្រ្តីនិងកុមារផ្ទុកមេរោគអេដស៍និងក្រុមគ្រួសាររបស់គេ។
របាយការណ៍របស់ UNAIDS បានលើកឧទាហរណ៍គំរូរបស់ប្រទេស ហ្គាណា ដែលបានធ្វើឲ្យមានការធ្លាក់ចុះនៃអត្រាការឆ្លងពីម្តាយទៅកូនពី៣២% នៅឆ្នាំ ២០០៩ មកនៅត្រឹម ៩% នៅឆ្នាំ ២០១៣ ខណៈដែលបានបង្កើនការផ្តល់សេវាពី៣២% នៅឆ្នាំ ២០០៩ រហូតដល់ទៅ ៩០% នៅឆ្នាំ ២០១២។
ដោយឡែកនៅកម្ពុជា រាជរដ្ឋាភិបាលតាមរយៈក្រសួងសុខាភិបាលនិងស្ថាប័នពាក់ព័ន្ធ ដោយរួមទាំងអង្គការសង្គមស៊ីវិលជាតិ និងអន្តរាជាតិផងបានធ្វើការប្តេជ្ញាចិត្តក្នុងការលុបបំបាត់ការឆ្លងពីម្តាយទៅកូន។
លោក ជួប សុខចំរើន នាយករងទទួលបន្ទុកប្រតិបត្តិការទូទៅរបស់អង្គការខាណាធ្លាប់បាននិយាយថា កម្ពុជានឹងលេងមានការឆ្លងមេរោគអេដស៍ពីម្តាយទៅកូនទៀតហើយនៅឆ្នាំ ២០២០ ហើយការងារនេះត្រូវបានអះអាងដោយក្រសួងសុខាភិបាល៕ អត្ថបទនេះផលិតឡើងក្រោមជំនួយសប្បុរសធម៌ពីប្រជាជនអាមេរិក តាមរយៈ USAID។ រាល់ខ្លឹមសារដែលមានក្នុងអត្ថបទនេះគឺជាការទទួលខុសត្រូវរបស់ អង្គការខាណា និងមិនបានឆ្លុះបញ្ចាំងទស្សនៈរបស់ USAID ឬរដ្ឋាភិបាលអាមេរិកឡើយ។