កុំមានការភ្ញាក់ផ្អើលនៃការបាញ់សាកល្បងកាំភ្លើងធំនៅរសៀលម៉ោង ៣ ថ្ងៃទី ២៥មករា
ភ្នំពេញ៖ ក្រសួងការពារជាតិប្រកាសថា នឹងមានការបាញ់សាកល្បងកាំភ្លើងធំ ១០៥មីលីម៉ែត្រ ចំនួន១០១ណាត់ នៅរសៀលថ្ងៃទី២៥ ខែមករា ឆ្នាំ២០១៣ គឺមុនព្រះរាជពិធីដង្ហែ ព្រះបរមសព ព្រះបរមរតនកោដ្ឋ។
សេចក្តីជូនដំណឹង របស់អគ្គមេបញ្ជាការកងយោធពលខេមរភូមិន្ទ ចេញផ្សាយនៅថ្ងៃទី១៧ ខែមករា ឆ្នាំ២០១៣ បានជូនដំណឹងដល់មហាជន និងអាជ្ញាធរដែនដី ក្នុងរាជធានីភ្នំពេញ និងខេត្តកណ្តាលថា ការបាញ់សាកល្បងបច្ចេកទេសកាំភ្លើងធំ ១០៥មីលីម៉ែត្រ១០១ណាត់ សម្រាប់ព្រះរាជពិធីដង្ហែព្រះបរមសព ព្រះបរមរតនកោដ្ឋ នៅថ្ងៃទី២៥ ខែមករា ឆ្នាំ២០១៣ វេលាម៉ោង៣រសៀល នៅទីតាំងកងពលតូចទ័ពពិសេសឆ័ត្រយោង៩១១ ស្ថិតនៅសង្កាត់កន្ទោក ខ័ណ្ឌពោធិសែនជ័យ រាជធានីភ្នំពេញ។
ការបាញ់កាំភ្លើងធំនោះ នឹងត្រូវធ្វើឡើងជាផ្លូវការនៅថ្ងៃដង្ហែព្រះបរមសព សម្តេចព្រះ នរោត្តម សីហនុ នៅព្រឹកថ្ងៃទី១ ខែកុម្ភៈ និងនៅថ្ងៃថ្វាយព្រះភ្លើង នៅរសៀលថ្ងៃទី៤ ខែកុម្ភៈ ឆ្នាំ២០១៣។
សេចក្តីជូនដំណឹង បានបន្ថែមថា សូមកុំមានការភ្ញាក់ផ្អើលរាល់សំឡេងស្នូរ នៃកាំភ្លើងចំថ្ងៃដែលបានជូនដំណឹងនោះ៕
