កូរ៉េទាំងពីរព្រមព្រៀងគ្នាបើកទ្វារតំបន់ឧស្សាហកម្មកែស៊ុង នៅថ្ងៃ១៦កញ្ញា
នៅថ្ងៃពុធនេះ កូរ៉េខាងជើងនិងកូរ៉េខាងត្បូង បានព្រមព្រៀងគ្នា សំរេចបើកទ្វារតំបន់ឧស្សាហកម្មកែស៊ុងអោយដំណើរការឡើងវិញ នៅថ្ងៃចន្ទ ទី១៦កញ្ញា សប្តាហ៍ក្រោយនេះហើយ។ តំបន់ឧស្សាហកម្មកែស៊ុង បានបិទទ្វារលែងដំណើរការ តាំងពីខែមេសាដើមឆ្នាំ ដោយសារតែភាពតានតឹងនៅឧបទ្វីបកូរ៉េ បន្ទាប់ពីក្រុងព្យុងយ៉ាងបានសាកល្បងនុយក្លេអ៊ែរខ្លួនជាលើកទី៣ ធ្វើអោយរដ្ឋាភិបាលកូរ៉េខាងជើងរងនូវទណ្ឌកម្មជាច្រើនពីសំណាក់ សហគមន៍អន្តរជាតិ។
បន្ទាប់ពីបាន ជួបប្រជុំគ្នាអស់ពេលមួយយប់មក នៅថ្ងៃពុធនេះ ប្រទេសកូរ៉េទាំងពីរបានសំរេចបើកទ្វារតំបន់ឧស្សាហកម្មកែស៊ុង នៅថ្ងៃចន្ទទី១៦កញ្ញា ខាងមុខនេះ អោយដំណើរការឡើងវិញ។ នៅពេលនេះ ប្រទេសទាំងពីរចាត់វិធានការហិរញ្ញវត្ថុ ដើម្បីអោយតំបន់ឧស្សាហកម្មកែស៊ុង ក្លាយជាតំបន់មួយនឹងនរ និងអាច ប្រជែងជាមួយតំបន់ឯទៀត នៅលើឆាកអន្តរជាតិ។
កូរ៉េ ខាងត្បូងបានទទូចអោយកូរ៉េខាងជើងទទួលយកលក្ខខណ្ឌ មួយចំនួនរបស់ខ្លួន បានដោយជោគជ័យ បែបយ៉ាងដូចជា អនុញ្ញាតអោយអ្នកវិនិយោគបរទេសបានចូលទៅតំបន់នោះ។ ក្រុងសេអ៊ូល សង្ឃឹមថា ប្រការនេះអាចជួយទប់ស្កាត់ក្រុងព្យុងយ៉ាងមិនអោយចាត់វិធានការ ប៉ះពាល់ដល់ប្រយោជន៍ខ្លួន។ ក្រុងសេអ៊ូលក៏បានសុំអោយក្រុងព្យុងយ៉ាង ផ្អាកការយកពន្ធដារផ្សេងៗដែលសហគ្រាសកូរ៉េខាងត្បូងត្រូវបង់ថ្លៃ ផងដែរ ដើម្បីជាការចេញសងដល់ការខាតបង់ចំណូលរាប់រយលានអឺរ៉ូ ដែលសហគ្រាសទាំងនោះទទួលរង តាំងពីពេលតំបន់ឧស្សាហកម្មបិទទ្វារ នៅខែមេសាមក។
គួរបញ្ជាក់ថា នៅតំបន់ឧស្សាហកម្ម Kaesong មានសហគ្រាសកូរ៉េខាងត្បូងចំនួន ១២៣។ តំបន់នេះស្ថិតក្នុងទឹកដីកូរ៉េខាងជើង មានចំងាយ១០គីឡូម៉ែត្រ ពីព្រំប្រទល់កូរ៉េទាំងពីរ។ តំបន់នេះ បង្កើតឡើងក្នុងទស្សវត្សឆ្នាំ២០០០ តំណាងការទូតរវាងកូរ៉េទាំងពីរ។ កែស៊ុងជាប្រភពចំណូលប្រាក់កាសតែមួយគត់សំរាប់កូរ៉េខាង ជើង ព្រោះថា ប្រទេសនេះបានរងទណ្ឌកម្មពីសហគមន៍អន្តរជាតិ ដោយសារតែមហច្ឆតានុយក្លេអ៊ែររបស់ ខ្លួន។
ភាពតានតឹងបង្កដោយការសាកល្បងនុយក្លេអ៊ែរលើកទី៣ របស់ក្រុងព្យុងយ៉ាង បានជំរុញអោយតំបន់កែ ស៊ុងបិទទ្វារ នៅខែមេសាដើមឆ្នាំ។ កូរ៉េខាងជើងបានហាមឃាត់បុគ្គលិកការងារកូរ៉េខាងត្បូងមិន អោយ ចូលទឹកដីខ្លួន ហើយបានដកបុគ្គលិកការងារខ្លួន៥ម៉ឺន៣ពាន់នាក់ ពីតំបន់ឧស្សាហកម្មកែស៊ុងនោះ៕ដោយ ព្រំ សឿន សូលីណា (RFI)
