គណៈបញ្ជាការសន្តិសុខអចិន្ត្រៃយ៍សំរាប់ការបោះឆ្នោតអំពាវនាវឲ្យបន្តភាពស្ងប់ស្ងាត់
ភ្នំពេញ៖ នៅថ្ងៃចន្ទ ទី១២ ខែសីហា នេះ គណៈបញ្ជាការ សន្តិសុខអចិន្ត្រៃយ៍សំរាប់ការបោះឆ្នោតដែលដឹកនាំដោយលោក ស ខេង រដ្ឋមន្ត្រីក្រសួងមហាផ្ទៃ បានចេញសេចក្តីអំពាវនាវថ្មី ដល់គណបក្សនយោ បាយ ពលរដ្ឋ អាជ្ញាធរ និងកងកម្លាំងមានសមត្ថកិច្ចទាំងអស់ ឲ្យបន្តរក្សាភាពស្ងប់ស្ងាត់ដើម្បីជៀសវាងនូវការប្រទូស្តរ៉ាយ ជាយថាហេតុនានា។
សេចក្តីអំពាវនាវនេះធ្វើឡើងក្រោយពីគណៈកម្មាធិការជាតិរៀបចំការបោះឆ្នោត (គ.ជ.ប) បានប្រកាសលទ្ធផលឆ្នោតបណ្តោះអាសន្ន ដែលក្នុងនោះគណៈបញ្ជាការសន្តិសុខអចិន្ត្រៃយ៍ បានសម្តែងនូវការខកចិត្តចំពោះការបដិសេធរបស់គណបក្សសង្គ្រោះជាតិ ក្នុងការចូលរួមពិភាក្សាអំពីការបង្កើតគណៈកម្មការពិសេសមួយសម្រាប់ ត្រួតពិនិត្យផ្ទៀងផ្ទាត់ភាពមិនប្រក្រតីនាអំឡុងពេលនៃការបោះឆ្នោត។
ស្ថាប័នដែលស្ថិតនៅក្រោមរដ្ឋាភិបាលមួយនេះ បានបន្ទោសដល់គណបក្សសង្គ្រោះជាតិថា បានខិតខំឃោសនាអូសទាញប្រជាពលរដ្ឋឲ្យចូលរួមធ្វើមហាបាតុកម្ម ប្រឆាំងនឹងលទ្ធផលនៃការបោះឆ្នោត ដែលជាហេតុបង្កឡើងនូវការព្រួយបារម្ភក្នុងចំណោមពលរដ្ឋខ្មែរ។
នៅក្នុងសេចក្តីអំពាវនាវរបស់ខ្លួន គណៈបញ្ជាការសន្តិសុខអចិន្ត្រៃយ៍សំរាប់ការបោះឆ្នោត បានអំពាវនាវដល់ពលរដ្ឋឲ្យបន្តរក្សាភាពស្ងប់ស្ងាត់ ហើយប្រកបរបរជាធម្មតាដើម្បីទុកឲ្យ គ.ជ.ប និងគណបក្សដែលទទួលបានអាសនៈចរចាគ្នាដោយសន្តិវិធី៕ Cambodia News
