គ.ជ.ប ពុំមានសិទ្ធិពន្យារពេលចុះឈ្មោះបោះឆ្នោតទេ
ភ្នំពេញ៖ នៅថ្ងៃទី២ ខែតុលា នេះ លោក អ៊ឹម សួស្តី ប្រធាន គ.ជ.ប បានថ្លែងបា្រប់ក្រុមអ្នករាយការណ៏ព័ត៏មាន ថា គណៈកម្មាធិការជាតិរៀបចំការបោះឆ្នោត (គ.ជ.ប) បានបដិសេធចំពោះការទាមទាររបស់គណបក្សសង្គ្រោះជាតិ ដែលស្នើឲ្យគ.ជ.ប ពន្យារពេលចុះឈ្មោះបោះឆ្នោត សម្រាប់ការពិនិត្យបញ្ជីឈ្មោះ និងការចុះឈ្មោះបោះឆ្នោត ឆ្នាំ២០១៣នេះ។
ប្រធាន គ.ជ.ប រូបនេះបន្តថា គ.ជ.ប អនុវត្តទៅតាមច្បាប់ ដែលនៅជាធរមាន ពុំអាចពន្យារពេលចុះឈ្មោះបោះឆ្នោត សម្រាប់ឆ្នាំ២០១៣នេះ បានទេ។ គ.ជ.ប ពុំមានសិទ្ធិពន្យារពេល តាមការទាមទាររបស់គណបក្សសង្គ្រោះជាតិបានទេ។
ទាក់ទងទៅនឹងបណ្តាខេត្តក្រុងមួយចំនួន ដែលមានគ្រោះទឹកជំនន់ ហើយពុំអាចទៅចុះឈ្មោះបោះឆ្នោតបាននោះ លោក អ៊ឹម សួស្តី បានបញ្ជាក់ថា ការចុះឈ្មោះអាចពន្យារពេល បានត្រឹម ពី៣ ទៅ៤ថ្ងៃប៉ុណ្ណោះ មិនអាចពន្យារទូទាំងប្រទេសបានទេ”។
គណបក្សសង្គ្រោះជាតិ បានស្នើឲ្យ គ.ជ.ប ពន្យារពេលការពិនិត្យបញ្ជីឈ្មោះ និងចុះឈ្មោះអ្នកបោះឆ្នោត សំរាប់ឆ្នាំ២០១៣ ដោយសំអាងថា ពេលនេះ គណបក្សកំពុងទាមទារឲ្យមានកំណែទម្រង់ស៊ីជម្រៅ ទាក់ទងទៅនឹងការបោះឆ្នោត ដែលគណបក្សសង្គ្រោះជាតិ និងគណបក្សប្រជាជនកម្ពុជា ជាគណបក្ស ដែលមានអាសនៈនៅក្នុងរដ្ឋសភា ត្រូវពិភាក្សាគ្នា នាពេលខាងមុខ៕ Cambodia News
