គណបក្សប្រជាជនកម្ពុជា កែទម្រង់រដ្ឋាភិបាលថ្មី ដោយប្តូររដ្ឋមន្ត្រីមួយចំនួន
ភ្នំពេញ៖ នៅសល់តែពីរសប្តាហ៍ទៀតប៉ុណ្ណោះរដ្ឋសភាថ្មីនឹងបើក សម័យប្រជុំលើកដំបូងតាមការកោះអញ្ជើញរបស់ព្រះមហាក្សត្រនៅ ថ្ងៃទី២៣កញ្ញា ប៉ុន្តែមកដល់ថ្ងៃអង្គារនេះ លោក ជាម យៀប សមាជិកគណៈអចិន្ត្រៃយ៍នៃ គណៈ កម្មាធិការកណ្តាលរបស់គណបក្សប្រជាជនកម្ពុជាបានឲ្យដឹងថា រចនាសម្ព័ន្ធថ្នាក់ដឹកនាំទាំងរដ្ឋសភានិងទាំងរដ្ឋាភិបាលនៅមិនទាន់ រៀបចំនៅឡើយទេ។
សម្រាប់រដ្ឋសភា លោក ជាម យៀប អះអាងថាគេនៅរង់ចាំមើលជំហររបស់គណបក្សស ង្គ្រោះជាតិដែលជាប់ឆ្នោតជាមួយគណបក្សប្រជាជនកម្ពុជាសម្រាប់ រដ្ឋសភាអាណត្តិថ្មី។រីឯនៅរាជរដ្ឋាភិបាល លោក ជាម យៀប ក៏បានឲ្យ ដឹងថាគណបក្សប្រជាជនកម្ពុជានៅមិនទាន់រៀបចំទេតែរដ្ឋាភិបាលថ្មីនឹងមាន ការកែទម្រង់ដោយសារតែបទពិសោធន៍បោះឆ្នោតកន្លងមកដែលគណបក្សប្រជាជន កម្ពុជាធ្លាក់សំឡេងឆ្នោត។ក្នុងនោះមានការផ្លាស់ប្តូររដ្ឋមន្ត្រី មួយចំនួនតែលោកជាមយៀបមិនទាន់ដឹងថាត្រូវប្តូររដ្ឋមន្ត្រីណាទេ។
ប៉ុន្តែការកែទម្រង់ណាក៏ដោយនៅរដ្ឋសភានិងនៅរដ្ឋាភិបាលត្រូវបានលោក ជាម យៀប បញ្ជាក់ថារដ្ឋសភានៅតែត្រូវដឹកនាំដោយលោកហេងសំរិននិងរដ្ឋាភិបាលនៅតែ ដឹកនាំដោយលោកនាយករដ្ឋមន្ត្រីហ៊ុនសែន។
គណបក្សសង្គ្រោះជាតិ តាមរយៈលោកសមរង្ស៊ីនិងលោកកឹមសុខាបានបញ្ជាក់ច្បាស់ ហើយថាគណបក្សប្រឆាំងមិនចូលរួមបង្កើតរដ្ឋាភិបាលជាមួយគណបក្សប្រជាជន កម្ពុជាទេហើយក៏មិនចូលរួមប្រជុំរដ្ឋសភាលើកដំបូងដែរបើសិនជាបញ្ហា បោះឆ្នោតមិនត្រូវបានដោះស្រាយ។
ប៉ុន្តែលោក ជាម យៀប បានបញ្ជាក់ថាទោះជាគណបក្សសង្គ្រោះជាតិធ្វើពហិការមិន ចូលរួមប្រជុំរដ្ឋសភាលើកដំបូងនៅថ្ងៃទី២៣កញ្ញាក៏មិនមានអ្វីជាប់គាំង ទេរួមទាំងការអនុម័តលើរចនាសម្ព័ន្ធសមាសភាពថ្នាក់ដឹកនាំរដ្ឋសភានិង រាជរដ្ឋាភិបាល ព្រោះរដ្ឋសភាត្រូវការសំឡេងត្រឹមតែ៥០ភាគរយបូក១ក្នុងចំណោម សមាជិករដ្ឋសភាសរុប១២៣រូប៕ Cambodia News
