លោក ឈាង វុន៖ ធ្វើរដ្ឋាភិបាលជាមួយបក្សប្រឆាំងប្រជាធិបតេយ្យគ្មានន័យ
ភ្នំពេញ ៖ លោក ឈាង វុន មានប្រសាសន៍ថា ការបោះឆ្នោតដែលប្រព្រឹត្តទៅកាលពីថ្ងៃទី២៨ កក្កដា កន្លងមក តាមលទ្ធផលបណ្តោះអាសន្នគណបក្សប្រជាជនកម្ពុជា នៅតែមានតួនាទីដែលប្រជាពលរដ្ឋទទួលស្គាល់ក្នុងការបោះ ឆ្នោតជូនលោកនាយករដ្ឋមន្ត្រី ហ៊ុន សែន បន្តការដឹកនាំប្រទេសតទៅទៀត ដើម្បីដោះស្រាយអ្វីៗជាច្រើនដែលបន្សល់ទុកពីរបបខ្មែរក្រហម ។
ដូច្នេះនៅនីតិកាលទី៥នេះ ប្រជាពលរដ្ឋបានប្រគល់ឱ្យគណបក្សប្រជាជនកម្ពុជាចំនួន៦៨ អាសនៈ ហើយគណបក្សសង្គ្រោះជាតិទទួលបាន៥៥អាសនៈ ដែលជាលទ្ធផលបឋមទទួលបាន ។
ចំពោះបញ្ហាដែលកើតឡើង ដល់ការបង្កើតរាជរដ្ឋាភិបាលចម្រុះ លោក ឈាន វុន បានបញ្ជាក់ថា «បញ្ហានេះរាជរដ្ឋាភិបាលកំពុងពិចារណាមើល ប៉ុន្តែប្រសិនបើយើងបង្កើតរាជរដ្ឋាភិបាលចម្រុះនោះ ប្រទេសដែលកាន់លទ្ធិប្រជាធិបតេយ្យលែងមានន័យទៀត ហើយការប្រកួតប្រជែងគ្នារវាងគណបក្សកាន់អំណាច និងគណបក្សប្រឆាំងក៏គ្មានន័យដែរ ។
បើយើងគិតមើលទៅប្រទេសកាន់របបលទ្ធិប្រជាធិបតេយ្យមួយ ចំនួនមានគណបក្សកាន់អំណាច និងគណបក្សប្រឆាំង» ។ តាមការវិវឌ្ឍរបស់ប្រទេសកាន់លទ្ធិប្រជាធិបតេយ្យនៅលើពិភពលោក មិនអាចមានគណបក្សនយោបាយណាមួយឈ្នះជារៀងរហូតនោះទេ ។
លោក ឈាង វុន បញ្ជាក់ថា បើអនុម័តត្រូវ៥០បូក១ វាអាចធ្វើទៅបានសម្រាប់កូរ៉ូមរបស់គណបក្សប្រជាជនកម្ពុជា ព្រោះ៦៨ទៅហើយ ប៉ុន្តែបើច្បាប់ណាតម្រូវឱ្យ២ភាគ៣នោះត្រូវតែមានការចូលរួមពី គណបក្សប្រឆាំង ។ ច្បាប់ដែលតម្រូវឱ្យមានការចូលរួម២ភាគ៣ គឺច្បាប់រៀបចំអង្គការ… ចំណែកការអនុម័តដែលត្រូវ៥០បូក១នោះមានច្បាប់កំណត់សមភាពរាជ រដ្ឋាភិបាល ច្បាប់រៀបចំថវិកាជាតិ ៕ Cambodia News