តុលាការគ្រោងហៅអ្នកកាសែត២នាក់ឲ្យឆ្លើយបំភ្លឺសំណុំរឿងលោក ឈុត វុទ្ធី
នៅថ្ងៃទី១៧ ឧសភា ២០១២ ខាងមុខនេះមន្រ្តីសង្គមស៊ីវិលនិយាយថា សាលាដំបូងខេត្តកោះកុងគ្រោងនឹងចេញដីកាកោះហៅអ្នកយកព័ត៌មាន ២រូប របស់កាសែត ឌឹ ខេមបូឌា ដេលី ដែលត្រូវគេចាត់ទុកថា ជាសាក្សីដ៏សំខាន់នៅក្នុងសំណុំរឿងដែលមានជាប់ពាក់ព័ន្ធទៅនឹងព្រឹត្តិការណ៍ឃាតកម្មលើប្រធានអង្គការការពារធនធានធម្មជាតិ និងមន្ត្រីប៉េអិមម្នាក់ កាលពីចុងខែមេសា កន្លងទៅនេះឲ្យឆ្លើយបំភ្លឺទាក់ទងរឿងបាញ់សម្លាប់លោក ឈុត វុទ្ធី។
មន្រ្តីសម្របសម្រួលសមាគមការពារសិទ្ធិមនុស្សអាដហុក លោក នាង បូរ៉ាទីណូ (Adhoc) ប្រចំាខេត្តកោះកុង បាននិយាយនៅថ្ងៃទី៧ ឧសភា ២០១២ ថា ព្រះរាជអាជ្ញារងនៃសាលាដំបូងខេត្តកោះកុង លោក ស្រី មាក់នី គ្រោងនឹងចេញដីកាកោះឲ្យអ្នកយកពត៌មាន ២រូប គឺកញ្ញា ផន បុប្ផា និងអ្នកជនជាតិកាណាដា របស់កាសែត ឌឹ ខេមបូឌា ដេលី ម្នាក់ទៀត ឆ្លើយបំភ្លឺនៅថ្ងៃទី១៧ ខែមេសា ឆ្នាំ២០១២ ខាងមុខនេះ។
ការចេញដីកាកោះនេះ ធ្វើឡើងនៅបន្ទាប់ពីគណៈកម្មការស៊ើបអង្កេតចម្រុះរបស់រដ្ឋាភិបាល បានបិទបញ្ចប់សំណុំរឿង ដោយមានការរិះគន់ដ៏ចម្រូងចម្រាសពីក្រុមអង្គការសង្គមស៊ីវិល កាលពីថ្ងៃសៅរ៍ ទី៥ មេសា ២០១២ កន្លងទៅថ្មីៗនេះ។ លទ្ធផលនៃការស៊ើបអង្កេតនេះ បានរកឃើញថា អំពើឃាតកម្មលើលោក ឈុត វុទ្ធី និងលោក អ៊ិន រតនា គឺជាទំនាស់បុគ្គល។
សូមរំលឹកថា អំពើឃាតកម្មដែលបណ្តាលឲ្យលោក ឈុត វុទ្ធី ប្រធានអង្គការការពារធនធានធម្មជាតិស្លាប់ កើតឡើងកាលពីថ្ងៃទី២៦ មេសា ២០១២ នៅចំណុចវាលបី ស្រុកមណ្ឌលសីមា ខេត្តកោះកុង ខណៈលោក អ៊ិន រតនា ជាមន្ត្រីប៉េអិមព្យាយាមរារាំង បន្ទាប់ពីលោក ឈុត វុទ្ធី ថតគំនរឈើមួយរបស់ក្រុមហ៊ុន ដែលគេស្គាល់ឈ្មោះថា ធីមប៊ឺ ហ្គ្រីន (Timber Green) ដែលទទួលបានសិទ្ធិពីរដ្ឋាភិបាលក្នុងការស្ដារបាតអាងដើម្បីធ្វើវារីអគ្គិសនីក្នុងស្រុកថ្មបាំង៕
