សមត្ថកិច្ចកំពុងតាមចាប់ខ្លួន ឈូក បណ្ឌិត មកផ្តន្ទាទោស
Cambodia News
ស្វាយរៀង៖ នៅថ្ងៃទី០១ ខែកក្កដា នេះ មន្ត្រីនគរបាលជាន់ខ្ពស់ខេត្តស្វាយរៀង អះអាងថា កម្លាំងសមត្ថកិច្ចកំពុងតាមចាប់ខ្លួនជនដៃដល់បាញ់កម្មការនី ជាអតីតអភិបាលក្រុងបាវិត លោក ឈូក បណ្ឌិត មកផ្តន្ទាទោសតាមដីកាចាប់ខ្លួនរបស់តុលាការ ហើយ ប៉ុន្តែមិនដឹងថា ឈូក បណ្ឌិត បច្ចុប្បន្ននេះ កំពុងលាក់ខ្លួននៅទីណានោះទេ។
ការស្វែងរកចាប់ខ្លួន លោក ឈូក បណ្ឌិត នេះ ធ្វើឡើង បន្ទាប់ពីសាលាដំបូងខេត្តស្វាយរៀង កាលពីថ្ងៃទី២៥ ខែមិថុនា ឆ្នាំ២០១៣ បានចេញសាលក្រមផ្តន្ទាទោសលោក ឈូក បណ្ឌិត ដាក់ពន្ធនាគារ១៨ខែ និងសំណងជំងឺចិត្ត ៣៨លានរៀល ពីបទបង្កបួសស្នាមដោយអចេតនា ពាក់ព័ន្ធនឹងព្រឹត្តិការណ៍បាញ់កម្មការនីឲ្យរងរបួស៣នាក់ នៅក្រុងបាវិត ខេត្តស្វាយរៀង កាលពីថ្ងែទី២០ ខែកុម្ភៈ ឆ្នាំ២០១២ និងចេញដីកាបង្គាប់ឲ្យសមត្ថកិច្ចតាមចាប់ខ្លួនមកផ្តន្ទាទោស។
អ្នកសម្របសម្រួលអង្គការការពារសិទ្ធិមនុស្ស លីកាដូ(Licadho) ប្រចាំខេត្តស្វាយរៀល លោក នុត បូព៌ណ្ណារតន៍ មានប្រសាសន៍ថា ជនដៃដល់បាញ់កម្មការនី លោក ឈូក បណ្ឌិត ដែលសមត្ថកិច្ចកំពុងតាមចាប់ខ្លួននោះ ពេលនេះមិនមានវត្តមាននៅខេត្តស្វាយរៀងទេ។
លោក យល់ឃើញថា សមត្ថកិច្ចទំនងជាពិបាកតាមចាប់ខ្លួនអតីតមន្ត្រីមានអំណាច លោក ឈូក បណ្ឌិត មកផ្តន្ទាទោសតាមច្បាប់៕
