រដ្ឋមន្ត្រីក្រសួងអប់រំ ជំរុញយុវជនអោយសិក្សាជំនាញកសិកម្ម និងបច្ចេកវិទ្យា
សារព័ត៌មាន Cambodia News/
កំពង់ស្ពឺ (២១ មិថុនា ២០១៧) ៖ ក្នុងសិក្ខាសាលាពិគ្រោះយោបល់លើសេចក្តីព្រាងកម្មវិធីសិក្សាថ្នាក់បរិញ្ញាបត្ររងបរិញ្ញាបត្ររបស់វិទ្យាស្ថានបច្ចេកវិទ្យាកំពង់ស្ពឺ កាលពីព្រឹកថ្ងៃទី២០ មិថុនា រដ្ឋមន្ដ្រីក្រសួងអប់រំយុវជននិងកីឡា លោកហង់ ជួនណារ៉ុន បានជំរុញឱ្យយុវជនកម្ពុជាសិក្សាជំនាញកសិកម្មនិងបច្ចេកវិទ្យា ស្របពេលដែលទីផ្សារការងារនៅកម្ពុជាលើវិស័យនេះកំពុងខ្វះខាត និងមានតម្រូវការធនធានមនុស្សដែលជួយដល់ការអភិវឌ្ឍន៍សេដ្ឋកិច្ច និងសង្គមនៅកម្ពុជា។
លោកហង់ ជួនណារ៉ុន បានបញ្ជាក់ថា ប្រទេសកម្ពុជាកំពុងខ្វះកម្លាំង ពលកម្មលើវិស័យកសិកម្មដើម្បីឆ្លើយតបនឹងតម្រូវការការងារក្នុងស្រុកលើមុខជំនាញផ្នែកវិទ្យាសាស្ត្រកសិកម្ម។ លោកថា ទីផ្សារការងារនៅកម្ពុជា បច្ចុប្បន្នកំពុងស្ថិតក្នុងបរិបទនៃការប្រកួតប្រជែងទាំងផ្នែកសេដ្ឋកិច្ចនិងបច្ចេកវិទ្យា ដែលជាកត្តាប្រឈមលើការកង្វះធនធាន មនុស្សសម្រាប់អភិវឌ្ឍសេដ្ឋកិច្ច និងសង្គម។
ក្នុងនោះដែរ លោករដ្ឋមន្ត្រី ក៏ជំរុញដល់គ្រប់គ្រឹះស្ថានសិក្សាទាំងអស់ ពង្រីកការបណ្តុះបណ្តាលលើជំនាញកសិកម្មនិងបច្ចេកវិទ្យាដល់យុវជនកម្ពុជានៅគ្រប់កម្រិត ដើម្បីបំពេញសេចក្តីត្រូវការការងារក្នុងស្រុក ក៏ដូចជាធ្វើការអភិវឌ្ឍវិស័យកសិកម្មនិងកសិឧស្សាហកម្មរបស់កម្ពុជាឱ្យកាន់តែមានសក្តានុពល ដែលទាក់ទាញដល់វិនិយោគជាតិ និងអន្តរជាតិច្រើនឡើងបន្ថែមទៀត៕
