គ្រឿងស្រវឹងកំពុងបំពុលយុវវ័យកម្ពុជាលើសពី ៥០ភាគរយ
សារព័ត៌មាន Cambodia News/
ភ្នំពេញ (១៩ សីហា ២០១៥) ៖ លោកវេជ្ជបណ្ឌិត មុំ គង់នាយកប្រតិបត្តិអង្គការចលនា ដើម្បីសុខភាពកម្ពុជាបានលើកឡើងថា គ្រឿងស្រវឹងកំពុងបំពុលយុវវ័យកម្ពុជាលើសពី ៥០ភាគរយ ហើយគ្រឿងស្រវឹងជាមូលហេតុចម្បងទី ២បណ្តាលឲ្យមានគ្រោះថ្នាក់ចរាចរ នឹងត្រូវខាតបង់ថវិកាប្រមាណ ៤៤លានដុល្លារអាមេរិករៀងរាល់ឆ្នាំ។
ការលើកឡើងតបស់ លោកវេជ្ជបណ្ឌិត មុំ គង់ ក្នុងជំនួបពិភាក្សាការងារជាមួយឯឧត្តម ខៀវ កាញារីទ្ធ រដ្ឋមន្ត្រីក្រសួងព័ត៌មានកាលពីព្រឹកថ្ងៃទី១៨ ខែ សីហា នៅទីស្តីការក្រសួងព័ត៌មាន នេះបើយោងតាមគេហទំព័រទីភ្នាក់ងារសារព័ត៌មានកម្ពុជា AKP។
នៅក្នុងជំនួបពិភាក្សា ឯឧត្តម ខៀវ កាញារីទ្ធ រដ្ឋមន្ត្រីក្រសួងព័ត៌មាន បានបញ្ជាក់ថា ការផ្សាយពាណិជ្ជកម្មទាក់ទងទៅនឹងគ្រឿងស្រវឹងក្រសួងព័ត៌មាន បានខិតខំធ្វើការហាមឃាត់ដល់វិទ្យុ និងទូរទស្សន៍ទាំងអស់ធ្វើការផ្សាយ ពាណិជ្ជកម្មក្នុងម៉ោងមាសពីម៉ោង៦ និង ៣០នាទីល្ងាចដល់ម៉ោង៨និង៣០ នាទីយប់។
ឯឧត្តម ក៏បានបញ្ជាក់ទៀតថា ក្រសួងព័ត៌មានមិនមានសិទ្ធិហាមឃាត់ការផ្សាយពាណិជ្ជកម្មគ្រឿងស្រវឹងទាំងស្រុងនោះទេ ព្រោះវាមានការប៉ះពាល់ដល់ការផលិតកម្មវិធីផ្សេងៗរបស់ទូរទស្សន៍ឯកជននានា ដែលមានចំណូលមកពីការផ្សាយពាណិជ្ជកម្មគ្រឿងស្រវឹងនេះហើយយកទៅទប់ជាមួយ នឹងកម្មវិធីអប់រំ ឬក៏កម្មវិធីផ្សេងៗទៀតដែលមិនមានចំណូល៕ ដោយ៖ ហេង នាង
