តុលាការកោះហៅលោក ជុំ ម៉ី ចូលបំភ្លឺ ថ្ងៃ ២៤ មិថុនា ជុំវិញការប្ដឹង លោក កឹម សុខា
Cambodia News
ភ្នំពេញ៖ យោងតាមមេធាវីដើមបណ្ដឹង ដែលជាអតីតអ្នករួចរស់ជីវិតពីគុកទួលស្លែងឲ្យដឹងថា តំណាងអយ្យការ សាលាដំបូងរាជធានីភភ្នំពេញ បានកោះហៅកូនក្ដីរបស់ខ្លួនគឺលោក ជុំ ម៉ី និងអតីជនរងគ្រោះនៃរបបខ្មែរក្រហម៣នាក់ទៀត ឲ្យចូលខ្លួនបំភ្លឺនាម៉ោង ៨: ៣០ នាទីព្រឹក និង ម៉ោង ២ : ៣០នាទីរសៀលថ្ងៃទី ២៤ មិថុនា ជុំវិញសំណុំរឿងប្ដឹងលោក កឹម សុខា ប្រធានស្ដីទីគណបក្សសង្គ្រោះជាតិ ពីបទបរិហាកេរ្តិ៏ជាសាធារណៈ ។
នាព្រឹកថ្ងៃទី ១៨ មិថុនា នេះថា អតីតជនរងគ្រោះនៃរបបខ្មែរក្រហមទាំងនោះ នឹង ត្រូវចោទសួរដោយលោក មាស ច័ន្ទពិសិដ្ឋ ព្រះរាជអាជ្ញារងសាលាដំបូងរាជធានីភ្នំពេញ ពីកម្មវត្ថុនៃបណ្ដឹងរបស់ពួកគេ ដែលបានដាក់ទៅកាន់តុលាការកាលពីថ្ងៃទី ១៤ មិថុនា ។
លោក ជុំ ម៉ី ដែលតំណាងឲ្យជនរងគ្រោះនៃរបបខ្មែរក្រហមបានប្ដឹងចោទលោក កឹម សុខា ពីបទបរិយាកេរ្តិ៏ជាសាធារណៈទាក់ទងការអត្ថាធិប្បាយរបស់លោកដែលថា រូបភាពសោកនាដកម្មដែលមាននៅគុកទួលស្លែង ជាឆាកល្ខោនដែលរៀបចំដោយវៀតណាម ។
លោក ជុំ ម៉ី បានហៅការលើកឡើងបែននេះថា ជាការប្រមាថជនរងគ្រោះ ហើយទាមទារឲ្យលោក កឹម សុខា សុំទោសជាសាធារណៈ រួមទាំងទាមទារប្រាក់១ពាន់ដុល្លារ ដែលត្រូវបានលោ អះអាងថា សម្រាប់យកទៅបង្សុកូលឲ្យដល់វិញ្ញាណក្ខន្ធជនរងគ្រោះ ៕
