ម៉ូតូ ២គ្រឿងបុកគ្នាស្លាប់ទាំង ២នាក់
ភ្នំពេញ ៖ កាលពីវេលាម៉ោង៦និង៣០នាទីព្រឹកថ្ងៃទី ២៦ ខែធ្នូ យុវជន ២នាក់បានស្លាប់បាត់បង់ជីវិតទាំង២នាក់ ដោយម្នាក់ស្លាប់នៅនឹងកន្លែងកើតហេតុ និងម្នាក់ទៀតស្លាប់នៅពេលបញ្ជូនទៅដល់មន្ទីរពេទ្យ បន្ទាប់ពីពួកគេជិះម៉ូតូបុកគ្នាចំពីមុខពេញទំហឹងក្នុងទិសដៅច្រាសគ្នា ស្ថិតនៅតាមផ្លូវជាតិលេខ៣ មុខភូមិស្រែញ សង្កាត់ពងទឹក ខណ្ឌដង្កោ។
ជនរងគ្រោះដែលស្លាប់នៅនឹងកន្លែងកើតហេតុនោះឈ្មោះ ដុម សុមនាសារដុមចន្ទសេរី ភេទប្រុស អាយុ២៩ឆ្នាំ មុខរបររៀនគ្រូបរិញ្ញាប័ត្ររស់នៅភូមិផ្សាររកា ឃុំរកាក្នុង ស្រុកដូនកែវ ខេត្ត តាកែវ ដោយជិះម៉ូតូម៉ាកហុងដាវ៉េវ ពណ៌ខ្មៅពាក់ស្លាកលេខតាកែវ 1D-3031។
ចំណែកភាគីម្ខាងទៀតដែលស្លាប់នៅមន្ទីរពេទ្យមានឈ្មោះ សុទ្ធឌីសាត ភេទប្រុស អាយុ២៦ឆ្នាំ រស់នៅភូមិខ្លាគ្រហឹម ឃុំអំពឹលទឹក ស្រុកកំពង់ត្រឡាច ខេត្តកំពង់ឆ្នាំង ដោយជិះម៉ូតូម៉ាកហុងដាសេ១២៥ ស៊េរី២០០៧ ពាក់ស្លាកលេខកណ្ដាល1E-9019។
ប្រភពព័ត៌មានឲ្យដឹងថា មុនពេលកើតហេតុគេឃើញម៉ូតូម៉ាកវ៉េវជិះម្នាក់ឯងក្នុងទិសដៅពីជើង ទៅត្បូង ហើយភាគីម៉ូតូសេ១២៥ជិះក្នុងទិសដៅពីត្បូងទៅជើងក្នុងបញ្ច្រាសទិស គ្នា។ លុះមកដល់ចំណុចកើតហេតុម៉ូតូទាំង២គ្រឿងក៏បុកគ្នានៅកណ្ដាល ទ្រូងផ្លូវចំពីមុខពេញទំហឹង រួចខ្ទាតមកចិញ្ចើមផ្លូវ។
ក្រោយពេលកើតហេតុគេឃើញភាគីម៉ូតូម៉ាកវ៉េវបានស្លាប់នៅនឹងកន្លែង កើតហេតុ ហើយភាគីម៉ូតូសេ១២៥ រងរបួសធ្ងន់ធ្ងរត្រូវបានគេបញ្ជូនមកសង្គ្រោះនៅមន្ទីរពេទ្យព្រះកុសុមៈ រួចក៏ស្លាប់តែម្ដង៕
ដោយ៖ ហេង នាង
