ព្រះសង្ឃលួចស្មន់ជាមួយប្រពន្ធគេនៅលើផ្ទះ
ខេត្តកំពង់ចាម: កាលពីព្រឹកថ្ងៃទី២៣ មេសា ២០១២ មានករណីព្រះសង្ឃមួយអង្គ លួចស្មន់ជាមួយប្រពន្ធគេនៅលើផ្ទះតែម្តង ហើយពេលប្តីស្ត្រីនោះតាមទាន់ព្រះសង្ឃកំហួចក៍រត់ឡើងពួនលើដំបូងផ្ទះ។
ព្រះសង្ឃកំហូចនេះព្រះនាម តាំង ម៉េងឈង់ ព្រះជន្ម ៣១វស្សា គង់នៅវត្តមង់បូរី ហៅវត្តមង់ បាននិមន្តចេញពីវត្តមកលួចសហាយស្មន់ជាមួយប្រពន្ធគេនៅលើផ្ទះឈ្មោះឡាយ លឹមឃាងអាយុ ៣៩ឆ្នាំ ឯបុរសជាប្តីមានឈ្មោះ រដ្ឋា សិទ្ធី អាយុ ៤៨ឆ្នាំ មានទីលំនៅឃុំជប់ទី១ ស្រុកត្បូងឃ្មុំ ខេត្តកំពង់ចាម។
លោក ហួត វុទ្ធី ព្រះរាជអាជ្ញាតុលាការខេត្តកំពង់ចាម បានឲ្យដឹងថា ទាក់ទងនឹងករណីសហាយស្មន់នេះ ក្រោយពេលលោកទទួលពាក្យបណ្តឹងមក លោកបានបង្ហាញថា ត្រូវតែនាំស្ត្រីជាប្រពន្ធ ដែលលួចមានសហាយស្មន់នោះមកជាមួយផង។ ប៉ុន្តែស្រាប់តែម្ចាស់ដើមបណ្តឹង (រដ្ឋា សិទ្ធី) បានកែសំណុំរឿងក្នុងពាក្យបណ្តឹងថា បានឈប់ប្តឹងដោយហេតុថា គាត់នៅស្រឡាញ់ប្រពន្ធគាត់ គាត់ចាត់ទុកថាមិនអី។
លោកព្រះរាជអាជ្ញាបានបញ្ជាក់ថា ដោយហេតុថារឿងនេះគ្មានដើមបណ្តឹង ខាងតុលាការមិនអាចចាត់រឿងសហាយស្មន់នេះបានទេ ដូច្នេះត្រូវតែដោះលែងព្រះសង្ឃនោះ និងស្ត្រីជាប្រពន្ធឲ្យមានសេរីភាពវិញ៕
