សមត្ថកិច្ចរារាំងអ្នកភូមិបឹងកក់មិនឲ្យរកអន្តរាគមន៍ពីនាយករដ្ឋមន្ត្រី
Cambodia News
ភ្នំពេញ៖ នៅថ្ងៃទី១៧ ខែមិថុនា នេះ សមត្ថកិច្ចជិត១០០នាក់ ប្រដាប់ដោយខែល ដំបងឆក់ និងអាវុធ បានរារាំងស្ត្រីនៅតំបន់បឹងកក់ជិត ៥០នាក់មិនឲ្យដង្ហែក្បួន រកអន្តរាគមន៍ពីនាយករដ្ឋមន្ត្រី រឿងជម្លោះដីធ្លី និងដោះលែង អ្នកស្រី យ៉ោម បុប្ផា ។
ការរាំងនោះ បានធ្វើឡើងនៅ សង្កាត់ស្រះចក ខណ្ឌដូនពេញ ខណៈដែលអ្នកភូមិធ្វើរូបទីងមោងចំនួន១១នាក់ តំណាងអោយអាជ្ញាធរមូលដ្ឋាន តំណាងក្រុមហ៊ុនស៊ូការគូអ៊ីន ដែលពួកគេថា បានរំលោភយកដី អតីតអភិបាលសាលារាជធានីភ្នំពេញ លោក កែប ជុតិមា មន្ត្រីតុលាការ ដែលអ្នកភូមិចោទថា ជាអ្នករំលោភលើអនុក្រឹត្យនាយករដ្ឋមន្ត្រី និងឃុបឃិតគ្នាបង្កើតឲ្យមានការចាប់ខ្លួនសកម្មជនដីធ្លី អ្នកស្រី យ៉ោម បុប្ផា ដាក់ពន្ធនាគារ ។
តំណាងអ្នកភូមិបឹងកក់ អ្នកស្រី ទេព វន្នី អះអាងថា អ្នកភូមិមានគម្រោង អូសរូបទីងមោង១១រូប នេះទៅទីស្តីការគណៈរដ្ឋមន្ត្រី ដើម្បីទៅប្តឹងលោកនាយករដ្ឋមន្ត្រីឲ្យដឹងថា អ្នកស្រី យ៉ោម បុបា្ផ ដែលកំពុងជាប់ពន្ធនាគារនោះ មិនមានកំហុសទេ។ អ្នកស្រីបន្តថា អ្នកដែលមានកំហុសប្រឆាំងនឹងនាយករដ្ឋមន្ត្រីនោះ គឺមន្ត្រីទាំង១១រូបពលរដ្ឋកំពុងតែទាក់កហូសតាមថ្នល់នោះទៅវិញទេ៕
