ក្រសួងមហាផ្ទៃអនុញ្ញាតឲ្យមហាបាតុកម្មមានអ្នកចូលរួមត្រឹម១ម៉ឺននាក់
ភ្នំពេញ៖ លោក ប៉ា សុជាតិវង្ស អភិបាលរាជធានីភ្នំពេញ បានសរសេរលិខិតមួយច្បាប់ផ្ញើរទៅកាន់ លោក សម រង្ស៊ី ប្រធានគណបក្សសង្គ្រោះជាតិ ដោយបានបញ្ជាក់ប្រាប់ប្រមុខបក្សប្រឆាំងរូបនេះ នូវគោលការណ៍ណែរនាំមួយចំនួនរបស់ក្រសួងមហាផ្ទៃ អំពីដំណើរការរៀបចំមហាបាតុកម្មរបស់គណបក្សសង្គ្រោះជាតិនៅថ្ងៃទី៧ ខែកញ្ញាស្អែកនេះ។
អភិបាលរាជធានីភ្នំពេញ បានប្រាប់ទៅកាន់ប្រមុខបក្សប្រឆាំងថា ក្រសួងមហាផ្ទៃបានសម្រេចអនុញ្ញាតឲ្យមហាបាតុកម្មរបស់គណបក្សសង្គ្រោះ ជាតិមានអ្នកចូលរួមមិនឲ្យលើសពី១ម៉ឺននាក់នោះទេ ហើយថា សម្រាប់មហាបាតុកម្មនេះគឺត្រូវធ្វើតែនៅលើទីលានប្រជាធិបតេយ្យ តែប៉ុណ្ណោះ ពោលគឺមិនអនុញ្ញាតឲ្យក្រុមបាតុករហែរក្បួនបាតុកម្មតាមដងផ្លូវនោះទេ។
ចំពោះពេលវេលានៃការធ្វើបាតុកម្មវិញនោះ ត្រូវបានលោកអភិបាលរាជធានីភ្នំពេញប្រាប់ថា មហាផ្ទៃអនុញ្ញាតឲ្យចាប់ផ្ដើមពីម៉ោង៧ព្រឹក រហូតដល់ ម៉ោង១២ថ្ងៃត្រង់ ក្រសួងមហាផ្ទៃហាមដាច់ខាតចំពោះការបោះជំរុំណាមួយ ដើម្បីបន្តការធ្វើបាតុកម្មនៅទីលានប្រជាធិបតេយ្យ ឬនៅកន្លែងដទៃទៀត៕ Cambodia News