គណបក្សសង្គ្រោះជាតិថ្កោលទោសការប្រើអំពើហិង្សារបស់គណបក្សកាន់អំណាច
Cambodia News
ភ្នំពេញ៖ កាលពីថ្ងៃទី៤ ខែកក្កដា គណបក្សសង្គ្រោះជាតិ បានថ្កោលទោសសកម្មជនគណបក្សប្រជាជនកម្ពុជា ដែលបានប្រើហិង្សាអុកទ្បុកក្បួនឃោសនារកសំទ្បេងឆ្នោតរបស់ គណបក្សសង្គ្រោះជាតិ ក្នុងសង្កាត់បី ខណ្ឌឬស្សីកែវ រាជធានីភ្នំពេញ។
សេចក្តីប្រកាសព័ត៌មានរបស់គណបក្សសង្គ្រោះជាតិ ចេញផ្សាយកាលពីថ្ងៃទី៤ ខែកក្កដាឲ្យដឹងថា សកម្មជនគណបក្សប្រជាជនកម្ពុជា បានជិះម៉ូតូ និងចាក់ធុងបាស់លើរថយន្ត តាមអុកទ្បុករំខានក្បួនដង្ហែរបស់ខ្លួន និងបានចាប់ហែកអាវអ្នកយកព័ត៌មានម្នាក់ របស់គណបក្សសង្គ្រោះជាតិ និងប្រតាយប្រតប់ដណ្តើមយកម៉ាស៊ីនថតរូបរបស់អ្នកយកព័ត៌មានរូបនោះ។
គណបក្សសង្គ្រោះជាតិអំពាវនាវ ឲ្យគណៈកម្មការរៀបចំការបោះឆ្នោតគ្រប់លំដាប់ថ្នាក់ ពង្រឹងតួនាទី ភារកិច្ច និងសមត្ថភាពរបស់ខ្លួន ប្រកបដោយតម្លាភាព និងស្មើភាពគ្នា ដោយមិនមានការរើសអើងគណបក្សនយោបាយណាមួយទ្បើយ ដើម្បីធានាឲ្យការបោះឆ្នោតជាតិខាងមុខ ប្រព្រឹត្តទៅដោយសេរី ត្រឹមត្រូវ និងយុត្តិធម៌៕
