រដ្ឋាភិបាលគ្រោងសាងសង់ស្ពានកាត់ទន្លេមេគង្គចំនួន២កន្លែងបន្ថែមទៀត
សារព័ត៌មាន Cambodia News/
ភ្នំពេញ (១៣ សីហា ២០១៤) ៖ រាជរដ្ឋាភិបាលកម្ពុជាមានគម្រោងស្ថាបនាស្ពានឆ្លងកាត់ទន្លេមេគង្គចំនួន ២កន្លែងបន្ថែមទៀត ស្ថិតនៅក្នុងតំបន់ជ្រោយចង្វា និងតំបន់ក្តីតាកុយ។
យោងតាមលិខិតអនុញ្ញាត របស់ទីស្តីការគណៈរដ្ឋមន្ត្រី ចុះថ្ងៃទី០៣មិថុនា និងបានផ្សព្វផ្សាយជាសាធារណៈនៅថ្ងៃទី១១ ខែសីហា ឆ្នាំ២០១៤ បានឲ្យដឹងថា រាជរដ្ឋាភិបាល តាមរយៈទីស្តីការ គណៈរដ្ឋមន្ត្រី បានអនុញ្ញាតឲ្យក្រុមហ៊ុនសាជីវកម្មសំណង់ស្ពានថ្នល់ចិន ( CRBC ) សាងសង់ស្ពានឆ្លងកាត់ទន្លេមេគង្គចំនួន ២កន្លែងបន្ថែមទៀត។
មួយនៅតំបន់ជ្រោយចង្វារ ស្ថិតត្រង់ចំណុចភូមិស្វាយជ្រុំ សង្កាត់ស្វាយជ្រុំ ខណ្ឌប្ញស្សីកែវ ភ្ជាប់ទៅសង្កាត់ជ្រោយចង្វា ខណ្ឌជ្រោយចង្វា និងមួយទៀត នៅតំបន់ក្តីតាកុយ ស្ថិតត្រង់ចំណុចភូមិអរិយក្សត្រ ស្រុកល្វាឯម ខេត្តកណ្តាល ភ្ជាប់ទៅភូមិក្តីតាកុយ សង្កាត់ព្រែកឯង ខណ្ឌច្បាអំពៅ រាជធានីភ្នំពេញ។
គួរបញ្ជាក់ថា គម្រោងការខាងលើនេះ រាជរដ្ឋាភិបាលបានឯកភាពហើយតាមសំណើរបស់ក្រុមប្រឹក្សាអភិវឌ្ឍន៍កម្ពុជា និងក្រសួងសាធារណការ និងដឹកជញ្ជូន និងយោងតាមការស្នើសុំរបស់សាជីវកម្មសំណង់ស្ពានថ្នល់ចិន (CRBC) ហើយគម្រោងការនេះ មានការអនុញ្ញាតពីរាជរដ្ឋាភិបាលជាផ្លូវការហើយ កាលពីពេលថ្មីៗនេះ ហើយបើមិនមាន ការរាំងស្ទះអ្វីទេនោះ ការសាងសង់អាចនឹងចាប់ផ្តើម នៅចុងឆ្នាំ២០១៤ ឬដើមឆ្នាំ ២០១៥៕
