ចេញពីផ្ទះតាមសង្សារ ម្តាយតាមទាន់ចាប់បោចសក់ និងវាយខ្នោះ
Cambodia News
ភ្នំពេញ៖ ដោយសេចក្តីស្រលាញ់បានពុះកញ្ច្រោលខ្លាំង នារីម្នាក់ដែលមានស្នេហាស្មោះចំពោះបុរស ដែលជាកម្មកររោងចក្រ និងគ្រួសារក្រីក្រម្នាក់ ត្រូវបានឪពុកម្តាយរបស់នាង ព្រមាននឹងធ្វើការហាមឃាត់ ដាច់អង្ហការ មិនឲ្យទាក់ទងគ្នា ទោះបីជាត្រូវឪពុកម្តាយវាយដំ ចាប់បោកសក់ កណ្តាលសាធារណៈ និងវាយខ្នោះឃុំឃាំងមិនឲ្យជួបមុខគ្នាយ៉ាងណាក៏ដោយ ក៏គេនៅតែមិនអាចឈប់ស្រលាញ់បុរសម្នាក់នោះបាន។
កាលពីវេលាម៉ោង ៨ នឹង០០នាទីយប់ថ្ងៃទី២៩ ខែឧសភា ឆ្នាំ២០១៣ រូបនាងក៏បានស្កាត់ទៅ ជួបមិត្តប្រុសរបស់ខ្លួន ដែលជាគូរសង្សា ប៉ុន្តែជាអកុសល ក៏ត្រូវឪពុកម្តាយតាមទាន់ ខណៈពេលដែលពួកគេកំពុងជិះម៉ូតូជាមួយគ្នា ស្ថិតនៅសង្កាត់បឹងទំពុន ខណ្ឌមានជ័យ ភ្លាមនោះ ឪពុកម្តាយរបស់នាងក៏បានចាប់បោចសក់ និងវាយខ្នោះកូនទាំងកណ្តាលសាធារណៈ ជាហេតុបង្កឲ្យមានការភ្ញាក់ផ្អើលដល់សមត្ថកិច្ចប៉ូលិស ចុះមកធ្វើការឃាត់ខ្លួនដើម្បីយកទៅសួរនាំតែម្តង។
នារីដែលត្រូវម្តាយចាប់បោកសក់ខាងលើនេះ ឈ្មោះ ស្រី ណែត អាយុ១៩ឆ្នាំ បាននិយាយរៀបរាប់ប្រាប់សមត្ថកិច្ចថា នាងនិងបុរសជាសង្សាឈ្មោះ ប៉ុល ឡេង អាយុ២០ឆ្នាំ បានបម្រើការងារនៅរោងចក្រ កាត់ដេរមួយកន្លែង នៅម្តុំជម្ពូវ័ន្ត ដោយបានលួចចាប់ចិត្តស្រឡាញ់គ្នាជាង១ឆ្នាំមកហើយ។
នាងបានបន្តរៀបរាប់ទាំងចិត្តក្តុកក្តួលថា ឪពុកម្តាយរបស់នាងមិនបានយល់ព្រមឲ្យពួកនាងទាក់ទងគ្នាឡើយ ហើយជារឿយៗពួកគាត់តែងតែធ្វើការបំបែកបំបាក់នឹងវាយធ្វើបាបមកលើរូបនាង ជានិច្ច ព្រោះពួកគាត់មិនចង់ឲ្យនាងស្រលាញ់គ្នា។ ចំពោះករណីខាងលើនេះ សមត្ថកិច្ចនៅមិនទាន់ដោះស្រាយបានយ៉ាងណានៅឡើយទេ ដោយសារតែ ឪពុកម្តាយ ដើរតួជាអ្នកមានគុណដ៏ធំបំផុតសម្រាប់ជីវិតរបស់កូនៗគ្រប់គ្នា តែដោយឡែក ចំពោះករណីខាងលើនេះ មានមហាជនមួយចំនួនបាននិយាយថា បើទោះបីជាកូនស្រលាញ់គ្នាជាមួយនឹងមនុស្សដែលយើងជាឪពុកម្តាយមិន ពេញចិត្តយ៉ាងណាក៏ដោយ ក៏មិនគួរវាយធ្វើបាបគ្នាយ៉ាងនេះដែរ។
ម្យ៉ាងវិញទៀត ក្នុងនាមយើងជាកូនស្រី បើទោះបីជាស្រលាញ់គ្នាខ្លាំងយ៉ាងណាជាមួយនឹងមនុស្សដែលខ្លួនយើង ស្រលាញ់ ក៏មិនត្រូវប្រព្រឹត្តិសកម្មភាពរត់ស្កាត់ណាត់ជួបគ្នាបែបនេះដែរ។ ឪពុកម្តាយចង់ឲ្យកូនល្អជានិច្ច ដូច្នេះបើយុវជន ឬយុវនារីណាម្នាក់រកឃើញមនុស្សដែលខ្លួនឯងស្រលាញ់ហើយ គួរណាស់ចេះរកដំណោះស្រាយ ឬពីមូលហេតុដែលឪពុកម្តាយគាត់មិនពេញចិត្តដោយសារអ្វី នឹងត្រូវចេះរកផ្លូវកណ្តាលសម្រាប់ដើរ ដើម្បីឲ្យបានតម្រូវចិត្តភាគីទាំងសងខាង ប្រសិនបើយើងមិនចង់បាត់បង់នរណាម្នាក់៕
