កម្ពុជាបើកកិច្ចប្រជុំរដ្ឋមន្ត្រីហិរញ្ញវត្ថុអាស៊ានលើកទី ១៦
នៅថ្ងៃទី៣០ មីនា ២០១២ ក្រសួងហិរញ្ញវត្ថុកម្ពុជា បានបើកកិច្ចប្រជុំរដ្ឋមន្ត្រីហិរញ្ញវត្ថុអាស៊ាន លើកទី១៦ នៅរាជធានីភ្នំពេញ ដើម្បីពិភាក្សាផ្ដោតលើវិធានការចាំបាច់នានា ដើម្បីធានាកំណើនសេដ្ឋកិច្ច និងការកៀរគរវិនិយោគទុកនៅតំបន់អាស៊ាន។
លោកនាយករដ្ឋមន្ត្រី ហ៊ុន សែន បានស្នើសុំឲ្យរដ្ឋមន្ត្រីហិរញ្ញវត្ថុអាស៊ាន និងអ្នកជំនាញសេដ្ឋកិច្ចនានា រិះរកយុទ្ធសាស្ត្រចាំបាច់នានា ដើម្បីទប់ស្កាត់វិបត្តិហិរញ្ញវត្ថុ និងសេដ្ឋកិច្ចនៅតំបន់អឺរ៉ុប និងសហរដ្ឋអាមេរិក រីករាលដាលមកតំបន់អាស៊ាន នៅគ្រាដែលកំណើនសេដ្ឋកិច្ចនៅតំបន់អាស៊ានក្នុងឆ្នាំ២០១១ កន្លងទៅនេះ បានស្ថិតនៅចំនួន ៤,៣ភាគរយស្របពេលដែលកំណើនសេដ្ឋកិច្ចពិភពលោក បានស្ថិតនៅក្នុងភាពតឹងតែង។
ការបើកកិច្ចប្រជុំរដ្ឋមន្ត្រីហិរញ្ញវត្ថុអាស៊ាន គឺពិភាក្សាផ្ដោតលើយុទ្ធសាស្ត្រចំនួន ៥ចំណុច ១គឺទស្សនវិស័យ និងការអភិវឌ្ឍសេដ្ឋកិច្ចតំបន់ ទី២ កិច្ចដំណើរការតាមដានសេដ្ឋកិច្ចអាស៊ាន ទី៣ ផែនទីបង្ហាញផ្លូវសំរាប់សមាហរណកម្ម រូបិយវត្ថុ និងហិរញ្ញវត្ថុអាស៊ាន ទី៤ កិច្ចសហប្រតិបត្តិការ ហិរញ្ញវត្ថុអាស៊ាន និងទី៥ កិច្ចសហប្រតិបត្តិការ ហិរញ្ញវត្ថុអាស៊ានបូក៣ មានប្រទេសចិន កូរ៉េខាងត្បូង និងប្រទេសជប៉ុន៕
