ចិនក្តៅក្រហាយចំពោះវត្តមានរបស់ប្រធានាធិបតីតៃវ៉ាន់នៅបុរីវ៉ាទីកង់
ក្រុងប៉េកាំងសំដែងនូវការក្តៅក្រហាយយ៉ាងខ្លាំងនៅថ្ងៃអង្គារនេះចំពោះ វត្តមានរបស់ប្រធានាធិបតីតៃវ៉ាន់ លោក Ma Ying-jeou ក្នុងពិធីបុណ្យសូត្រធម៌ ចូលកាន់តំណែងរបស់សម្តេចសង្ឃប៉ាប កាតូលិក François នៅបុរីវ៉ាទីកង់។ ដោយសារតែវត្តមានរបស់ប្រធានាធិបតីកោះតៃវ៉ាន់នេះ ចិនបានបដិសេធមិនបញ្ជូនតំណាងរបស់ខ្លួន អោយចូលរួមក្នុងពិធីបុណ្យនេះឡើយ។
“យើងសង្ឃឹមថា បុរីវ៉ាទីកង់នឹងចាត់វិធានការជាក់ស្តែង ដើម្បីអោយលក្ខខណ្ឌនៃទំនាក់ទំនងបានប្រសើរឡើងវិញ។” នេះជាការប្រកាសរបស់លោកស្រី Hua Chunying អ្នកនាំពាក្យក្រសួងការបរទេសចិន ទាក់ទងទៅនឹងទំនាក់ទំនងរវាងចិន និងបុរីវ៉ាទីកង់។
នៅថ្ងៃអង្គារនេះ ក្រុងប៉េកាំងសំដែងការក្តៅក្រហាយយ៉ាងខ្លាំង ដោយសារតែឃើញវត្តមានរបស់ប្រធានាធិបតីតៃវ៉ាន់ លោក Ma Ying-jeou ក្នុងពិធីបុណ្យសូត្រធម៌របស់សម្តេចសង្ឃប៉ាប កាតូលិក François ចូលកាន់តំណែង នៅបុរីវ៉ាទីកង់។ វត្តមានរបស់ប្រធានាធិបតីកោះតៃវ៉ាន់ បានធ្វើអោយចិនបានបដិសេធមិនបញ្ជូនតំណាងរបស់ខ្លួន ចូលរួមក្នុងពិធីបុណ្យនេះឡើយ។ហើយចិន ក៏បានតវ៉ាជាមួយនឹងរដ្ឋាភិបាលប្រទេសអ៊ីតាលីផងដែរ ថាបានចេញទិដ្ឋាកាឆ្លង ដែនអោយដល់ លោក Ma Ying-jeou អោយបានមកចូលរួមក្នុងពិធីបុណ្យនេះ។
គួររំលឹកថា កាលពីឆ្នាំ ២០០៥ ប្រធានាធិបតីចាស់តៃវ៉ាន់ចាស់ គឺលោក Chen Shui-bian ក៏ធ្លាប់បានមកចូលរួមក្នុងពីធិបុណ្យសពរបស់សម្តេចប៉ាប Jean Paul ២ នៅបុរីវ៉ាទីកង់ផងដែរ។
បុរីវ៉ាទីកង់បានបញ្ជាក់ទៅវិញថា ពិធីបុណ្យ messe ជាពិធីបុណ្យសាធារណៈ ហើយថា មិនបានអញ្ជើញអ្នកណាម្នាក់អោយមកចូលរួមនោះឡើយ។“ជនគ្រប់រូបសុទ្ធតែត្រូវបានស្វាគមន៍។ គ្មានអ្នកណាម្នាក់ត្រូវបានគេផ្តល់អាទិភាពនោះឡើយ។” នេះជាការឆ្លើយតបរបស់មន្ត្រីសង្ឃ Federico Lombardi ដែលជាអ្នកនាំពាក្យរបស់បុរីវ៉ាទីកង់។
គួររំលឹកថា ជាច្រើនលើកច្រើនសារ បុរីវ៉ាទីកង់តែងតែបង្ហាញថាខ្លួនសុខចិត្តលះបង់ទំនាក់ទំនងជាមួយ តៃវ៉ាន់ ប្រសិនបើចិនព្រមផ្តល់សេរីភាពអោយដល់សាសនាកាតូលិក និងផ្តល់សិទ្ធិដល់សម្តេចសង្ឃប៉ាប ក្នុងការតែងតាំងមន្ត្រីសង្ឃ នៅក្នុងប្រទេសចិន។
ប៉េកាំងតែងតែបដិសេធមិនអោយបុរីវ៉ាទីកង់មានសិទ្ធិសំរេចតែងតាំង មន្ត្រីសង្ឃនោះឡើយ ។ ការរឹងទទឹងនេះ ជាញឹកញយបានបង្កអោយក្លាយទៅជាជម្លោះ។ យោងតាមស្ថិតិផ្លូវការមួយ ជនជាតិចិនដែលកាន់សាសនាកាតូលិកមាន ៥,៧ លាននាក់។ ពួកគេនៅតែរងគ្រោះក្នុងការធ្វើទុក្ខបុកម្នេញ និងការគ្រប់គ្រងនៅក្នុងស្រុកនៅឡើយ បើទោះជាស្ថានភាពហាក់បានប្រសើរជាងមុនក៏ដោយ។
ចិនបានកាត់ផ្តាច់ទំនាក់ទំនងការទូតជាមួយបុរីវ៉ាទីកង់ នៅឆ្នាំ ១៩៥៧ បន្ទាប់ពីបុរីវ៉ាទីកង់បានទទួលស្គាល់ថាតៃវ៉ាន់ជាដែនដីមួយស្រប ច្បាប់ ឯករាជ្យដាច់ពីចិន។ នៅក្នុងប្រទេស ចិនបានបង្កើតអោយមានវិហារគ្រិស្តសាសនាជាច្រើន ដែលវិហារទាំងនេះស្ថិតនៅក្រោមការត្រួតត្រារបស់រដ្ឋអំណាច កុំម្មុយនិស្តចិន។ នៅឆ្នាំ ១៩៥៧ នេះដែរ គេសង្កេតឃើញមានអ្នកកាន់សាសនាគ្រិស្តជាច្រើននាក់ ត្រូវបានរងគ្រោះក្នុងការកាប់សំលាប់ក្នុងស្រុក៕ដោយព្រំ សឿន សូលីណា (RFI)
