អ្នកទោសទំនើងប្រយុទ្ធគ្នាក្នុងពន្ធនាគារនៅប្រេស៊ីលបណ្ដាលឲ្យស្លាប់៥២នាក់
សារព័ត៌មាន Cambodia News/
ប្រេស៊ីល ៖ មន្ត្រីពន្ធនាគារបាននិយាយថា យ៉ាងហោចណាស់មនុស្ស៥២នាក់ស្លាប់នៅក្នុងកុបកម្មពន្ធនាគារមួយនៅក្នុងប្រទេសប្រេស៊ីល បន្ទាប់ពីក្រុមអ្នកទោសទំនើងបានបើកឆាកប្រយុទ្ធគ្នាអស់រយៈពេល៥ម៉ោង ខណៈដែលអ្នកទោសក្រុមទំនើង មកពីអគារមួយនៃពន្ធនា គារបានបំពានទៅលើអ្នកទោសផ្នែកមួយផ្សេងទៀត នៅពន្ធនាគារ Altamira ស្ថិតក្នុងរដ្ឋ Pará របស់ប្រេស៊ីល។ នេះបើយោងតាមប្រភពពីសារព័ត៌មាន BBC ។
ក្រុមមន្ត្រីបាននិយាយនៅក្នុងសន្និសីទកាសែតមួយថាអ្នកស្លាប់ចំនួន១៦នាក់ត្រូវបានគេកាត់ក្បាល ក្រៅពីនោះគឺស្លាប់ដោយសារថប់ដង្ហើមបន្ទាប់ពីផ្នែកមួយនៃពន្ធនាគារត្រូវបានដុតបំផ្លាញ។ មន្ត្រីពន្ធនាគារពីរនាក់ដែលត្រូវបានចាប់ជាចំណាប់ខ្មាំងត្រូវបានដោះលែង។ ក្រុមមន្ត្រីបានបញ្ជាក់ថា អំពើហិង្សានេះបានចាប់ផ្តើមនៅម៉ោងប្រហែល០៧ និង០០នាទីម៉ោងក្នុងស្រុក (ម៉ោង១០ព្រឹក) ហើយបានបញ្ចប់នៅវេលាថ្ងៃត្រង់។
គួរបញ្ជាក់ថា កាលពីខែឧសភាកន្លងទៅ, មនុស្ស៤០នាក់ ត្រូវបានគេសម្លាប់ក្នុងថ្ងៃតែមួយ នៅពន្ធនាគារ៤ទីតាំងផ្សេងគ្នា ស្ថិតក្នុងទីក្រុង Manaus រដ្ឋ Amazonas ដោយការសម្លាប់នេះ បានកើតឡើងក្រោយ១ថ្ងៃ បន្ទាប់ពីមនុស្ស១៥នាក់បានស្លាប់ ក្នុងការប្រយុទ្ធគ្នានៅពន្ធនាគារ នៅក្នុងតំបន់៕
