ក្រុមហ៊ុនបញ្ជាទិញសម្លៀកបំពាក់ធំៗអំពាវនាវឲ្យកម្ពុជាចាប់ខ្លួនអ្នកបាញ់កម្មករ
នៅថ្ងៃទី១២ មីនា ២០១២ ទីភ្នាក់ងារព័ត៌មានបារាំងAFPបានផ្សាយឲ្យដឹងថា ក្រុមហ៊ុនបញ្ជាទិញសម្លៀកបំពាក់ធំៗថ្នាក់ពិភពលោករួមមាន Puma Gap និង H&M បានថ្លែងថា ពួកគេមានក្តីព្រួយបារម្ភយ៉ាងខ្លាំងចំពោះហេតុការណ៍បាញ់រះលើកម្មករកាលពីថ្ងៃទី២០ កុម្ភៈ។
ក្រុមហ៊ុនធំៗទាំងបីបានសរសេរលិខិតរួមមួយទៅក្រសួងពាណិជ្ជកម្មកម្ពុជា កាលពីថ្ងៃទី៩មីនាដើម្បីទាមទារឲ្យរដ្ឋាភិបាលចាប់ខ្លួនជនសង្ស័យបាញ់កម្មការិនី។ ខ្លឹមសារលិខិតនោះសរសេរថា កម្មការិនី៣នាក់របស់រោងចក្រកាត់ដេរសម្លៀកបំពាក់កីឡារបស់ក្រុមហ៊ុន Puma ត្រូវបានគេបាញ់ឲ្យរបួស ដូច្នេះតម្រូវឲ្យមានការស៊ើបអង្កេតអោយបានពេញលេញប្រកបដោយតម្លាភាព។
ការទាមទាររបស់ក្រុមហ៊ុនធំៗទាំងបីធ្វើឡើង នៅពេលដែលតុលាការបានកោះហៅជនសង្ស័យឈ្មោះ ឈូក បណ្ឌិតអតីតអភិបាលក្រុងបាវិត អោយចូលបំភ្លឺនៅថ្ងៃទី១៦មីនាសប្តាហ៍នេះ។ ដីកាកោះអោយជនសង្ស័យចូលខ្លួនបំភ្លឺសំណុំរឿងឧក្រិដ្ឋនេះ មែនប៉ុន្តែសមត្ថកិច្ចនៅមិនទាន់ចាប់ខ្លួនជនសង្ស័យដែលកំពុងរស់នៅលាក់ខ្លួននេះនៅឡើយទេ។
សូមរម្លឹកថា ក្រោយព្រឹត្តិការណ៍បាញ់កម្មការិនី៣នាក់អោយរបួសនៅក្នុងការតវ៉ាមួយនៅថ្ងៃទី២០កុម្ភៈ ក្រុមហ៊ុនPuma ក៏បានបញ្ជូនមន្ត្រីរបស់ខ្លួនមកកម្ពុជាដើម្បីតានដានហេតុការណ៍ដោយផ្ទាល់ផងដែរ៕