ក្រសួងព័ត៌មានចាប់ផ្ដើមរៀបចំបញ្ជីឈ្មោះអ្នកសារព័ត៌មាន ដែលត្រូវចូលរួមក្នុងជំនួប រវាងសម្ដេច ហ៊ុន សែន
សារព័ត៌មាន Cambodia News/
ភ្នំ ពេញ (០៩ មិថុនា ២០១៦) ៖ រដ្ឋមន្រ្ដីក្រសួងព័ត៌មានបានប្រកាសថា ក្រសួងកំពុងតែ រៀបចំបញ្ជីឈ្មោះអ្នកសារព័ត៌មាន ដែលមកពីគ្រប់អង្គភាពផ្សេងៗគ្នា ដើម្បីកំណត់ពេលវេលាក្នុងការ ចូលរួមនៅក្នុងកម្មវិធីជួបជុំជាមួយ សម្ដេចតេជោ ហ៊ុន សែន នាយករដ្ឋមន្រ្ដី នៃព្រះរាជាណាចក្រកម្ពុជា ជាមួយអ្នកសារព័ត៌មាននាពេលខាងមុខ។
ឯកឧត្តម ខៀវ កាញារីទ្ធ រដ្ឋមន្រ្ដីក្រសួង ព័ត៌មាន បានមានប្រសាសន៍ថា ក្រសួងបានរៀបចំបញ្ជីឈ្មោះអ្នកកាសែតដែលត្រូវចូលរួមក្នុងជំនួប រវាងសម្ដេចតេជោ ហ៊ុន សែន នាយករដ្ឋមន្រ្ដីនៃព្រះរាជាណាចក្រកម្ពុជា ដោយជ្រើសរើសយកតែ សារព័ត៌មានចេញផ្សាយជាប្រ ចាំរួមមានវិទ្យុ ទូរទស្សន៍ កាសែត ទស្សនាវដ្ដី និងគេហទំព័រដោយ ក្នុងមួយអង្គភាពត្រូវយកចំនួនពីរនាក់។
ឯកឧត្តមបានបញ្ជាក់ថា ការរៀបចំបញ្ជីឈ្មោះអ្នកកាសែតនេះ ដើម្បីផ្ញើជូនសម្ដេចតេជោ នាយករដ្ឋមន្ដ្រី ពិនិត្យ និងសម្រេចជាចុងក្រោយ ដោយត្រូវកំណត់ពេលវេលាឱ្យបានច្បាស់ លាស់ និងចំនួនអ្នកកាសែត ដែលត្រូវចូលរួមមិនឱ្យលើសពី៤០០នាក់នោះទេ។
ឯកឧត្តមរដ្ឋមន្រ្ដីបានបន្ដថា កន្លងមកនេះ សម្ដេចតេជោនាយករដ្ឋមន្រ្ដីបានឯកភាពហើយ ក្នុងមួយឆ្នាំ ជួបជុំជាមួយអ្នកកាសែតម្ដង ហើយសម្រាប់ឆ្នាំនេះ គ្រោងធ្វើនៅខែកក្កដា ឬខែកញ្ញា ខាងមុខនេះ។ ប៉ុន្ដែសម្រាប់ឆ្នាំក្រោយ និងឆ្នាំបន្ដបន្ទាប់ទៀត ការជួបជុំរវាងនាយករដ្ឋមន្រ្ដី និងអ្នកកាសែត ត្រូវជ្រើសរើសយកថ្ងៃដែលរដ្ឋសភាអនុម័តជ្រើសរើសសម្ដេចតេជោ ឡើងធ្វើជានាយករដ្ឋមន្រ្ដី ដោយកំណត់យក ថ្ងៃនេះជារៀងរាល់ឆ្នាំ៕
