សិក្ខាសាលាស្តីពី«ការប្រឆាំងនឹងការផ្តល់ហិរញ្ញប្បទានដល់ភេរវកម្ម»
Cambodia News
ភ្នំពេញ៖ នៅថ្ងៃទី១១ ខែមិនា ឆ្នាំ២០១៣នេះ ក្រុមមន្រ្តីនានាដែលមានការ ពាក់ព័ន្ធនឹងកម្ពុជា បានមកទទួលការបណ្តុះបណ្តាលវគ្គជំនាញមួយ ក្នុងការប្រឆាំងនឹងការផ្តល់ហិរញ្ញប្បទានដល់ភេរវកម្ម ជាមួយនិងមន្រ្តីដទៃទៀតមកពីប្រទេសឥណ្ឌូណេស៊ី ម៉ាឡេស៊ី និងហ៊្វីលីពីន ដោយមានការឧបត្ថម្ភពីស្ថានទូតអង់គ្លេស។
សិក្ខាកាម ដែលមកចូលរួមវគ្គបណ្ដុះបណ្ដាលនេះ មានតំណាងមកពីធនាគារជាតិ ចៅក្រម ព្រះរាជអាជ្ញា មន្រ្តីអនុវត្តច្បាប់ មន្រ្តីអធិការកិច្ចពន្ធដារ អង្គការស្ថាប័ននានា និងវិស័យឯកជនផងដែរ។
លោក ម៉ាក ហ្គូដឌីង ឯកអគ្គរាជទូតអង់គ្លេសប្រចាំកម្ពុជា បានថ្លែងនៅក្នុងសិក្ខាសាលារយៈ ពេល៥ថ្ងៃនោះថា ការដែលសហគមន៍អន្តរជាតិធ្វើការរួមគ្នា គឺជារឿងសំខាន់ដើម្បីឆ្លើយតបទៅនឹងការគំរាមកំហែងទាំងឡាយ របស់ពួកភេរវករ ដែលធ្វើឲ្យចុះខ្សោយនូវប្រសិទ្ធភាពការងារនិងកិត្យានុភាពនៃ សេដ្ឋកិច្ចជាតិ។
លោកបន្តថា កម្មវិធីនេះ បើកផ្លូវឱ្យយើង ធ្វើការក្នុងភាពជាដៃគូជាមួយស្ថាប័ននានា ដើម្បីលើកកម្ពស់ជំនាញជាក់លាក់ ដែលជួយកម្ពុជា ប្រយុទ្ធប្រឆាំងនឹងការគំរាមកំហែង ពីឧក្រិដ្ឋកម្មលាងលុយកខ្វក់ ហើយក៏នឹងជួយរួមចំណែកដល់ការអភិវឌ្ឍសេដ្ឋកិច្ចប្រកបដោយនិរន្តរភាព របស់កម្ពុជាផងដែរ៕
