មន្ត្រីយោធាថៃពាក់ព័ន្ធក្នុងការរកស៊ីរត់ពន្ធមនុស្ស
អាជ្ញាធរថៃ បានបើកការអង្កេតមួយស្តីពីតួនាទីរបស់មន្ត្រីយោធាថៃដែលពាក់ ព័ន្ធនឹងការរត់ពន្ធជនភៀសខ្លួនភាគតិច Rohingyas, ដែលរត់ចេញពីភូមា ដើម្បី គេចផុតពីអំពើហិង្សារវាងសហគមន៍សាសនា។ ជនភាគតិច Rohingyas,ដែលភៀសខ្លួនទៅកាន់ប្រទេសម៉ាឡេស៊ី អាចនឹងធ្លាក់ខ្លួននៅក្រោមចំណុះនៃពួករត់ពន្ធមនុស្សដែលគេហៅ ថា »មេខ្យល់ »។ ជនភៀសខ្លួនណាដែលគ្មានលុយបង់ឲ្យពួកមេខ្យល់នោះទេ ពួកគេអាចនឹងត្រូវគេចាប់បង្ខំឲ្យធ្វើពលកម្ម។ មេទាហានថៃ ដែលជាមេកងអង្គភាពនៅក្នុងតំបន់ ក៏មានជាប់ពាក់ព័ន្ធនៅក្នុងការរត់ពន្ធជនភៀសខ្លួន Rohingyas នេះដែរ-នេះបើយោងតាមការបញ្ជាក់ពីប្រភពមួយនៃក្រសួងស៊ើបការថៃ ប្រាប់ដល់ទីភា្នក់ងារសារព័ត៌មានបារាំងAFP។
ជនភាគតិចរ៉ូហីងយ៉ា(Rohingyas), ជាច្រើនរយនាក់ ក្នុងរយៈពេលប៉ុន្មានថ្ងៃចុងក្រោយនេះ បានភៀសខ្លួនចូលមកដល់ប្រទេសថៃ ដើម្បីគេចពីអំពើហិង្សារវាងសហគមន៍ពុទ្ធសាសនានិងសហគមន៍អ៊ីស្លាម។ អំពើហិង្សាដែលបានបណ្តាលឲ្យស្លាប់មនុស្សចំនួន១៨០នាក់កាលពីឆ្នាំ មុននៅភាគខាងលិចប្រទេសភូមា។
ជនភៀសខ្លួនទាំងអស់នោះ ក្រោយពីបានធ្វើដំណើរតាមកប៉ាល់ ប្រកបដោយគ្រោះថ្នាក់មក នៅពេលមកដល់ឆ្នេរសមុទ្រAndaman ភាគខាងលិចប្រទេសថៃ ក៏ត្រូវបានគេចាប់ខ្លួនទៀត។
យោងតាមប្រភពស៊ើបការណ៍ថៃ ជនភៀសខ្លួនរ៉ូហ៊ីងយ៉ាដែលអាចចូលជាន់លើទឹកដីថៃក៏ដោយសារមានជំនួយ រនុកក្នុងដែរ ពោលគឺជំនួយពីក្រុមមន្ត្រីថៃពុករលួយមួយចំនួនដែលជាឈ្មួញកណ្តាល។ ជនភាគតិច Rohingyas ដើម្បីធ្វើដំណើរទៅដល់ប្រទេសម៉ាឡេស៊ីតាមជើងគោកក្នុងម្នាក់ៗត្រូវ បង់ប្រាក់ឲ្យគេរវាងពី៤ម៉ឺនបាតទៅ៦ម៉ឺនបាតឬត្រូវជា ១០០០ អឺរ៉ូ ទៅ១៥០០អឺរ៉ូ។
លោក Pardorn Pattanthabutr អគ្គលេខាធិការនៃក្រុមប្រឹក្សាសន្តិសុខជាតិ បានប្រកាសថា” អាជ្ញាធរថៃកំពុងធ្វើការអង្កេតមួយដើម្បីតាមរកចាប់ខ្លួនពួក មន្ត្រីយោធាណាដែលជាប់ពាក់ព័ន្ធក្នុងការរកស៊ីរត់ពន្ធមនុស្ស នេះ ហើយក៏នឹងត្រូវដាក់ទណ្ឌកម្មជាទម្ងន់ដែរ។
កាលពីសប្តាហ៍មុន រដ្ឋាភិបាលថៃ ធ្លាប់បានជូនដំណឹងអំពីការអនុញ្ញាតឲ្យស្នងការជាន់ខ្ពស់របស់អសប ទទួលបន្ទុកជនភៀសខ្លួន HCR អាចចូលជួបប្រាស្រ័យជាមួយជនភៀសខ្លួន Rohingyas។ ក៏ប៉ុន្តែ ប៉ូលិសថៃវិញដែលរហូតមកទល់ពេលនេះ នៅតែចាត់ទុកជនភាគតិច Rohingyas,ថាជាក្រុមជនអន្តោប្រវេស្តន៍ខុសច្បាប់នឹងក៏ត្រូវធ្វើ ការបណ្តេញចេញពីប្រទេសថៃដែរ។
គួររំលឹកថា ជនភាគតិច Rohingyasប្រមាណជា៨សែននាក់ រស់នៅក្នុងរដ្ឋរ៉ាគីន ដែលជាតំបន់ដ៏សែនក្រីក្រមួយស្ថិតនៅដាច់ ឆ្ងាយស្រយាលក្នុងប្រទេសភូមា។ ជនភៀសខ្លួន ភាគតិចRohingyas ចំនួន៣សែននាក់ទៀត កំពុងរស់នៅផ្តុំគ្នាយ៉ាងកកកុញពេញក្នុងជំរំជនភៀសខ្លួននា នានៅប្រទេសបង់ក្លាដែស។
មកទល់ពេលនេះ មានតែប្រទេសម៉ាឡេស៊ីមួយប៉ុណ្ណោះគត់ ដែលសុខចិត្ត ទទួលយកជនភៀសខ្លួន Rohingyasនេះ ទោះបីជាមានការអំពាវនាវរបស់អសប ដល់បណ្តាប្រទេសទាំងអស់នៅក្នុងតំបន់ ឲ្យជួយទទួលយកជនភៀសខ្លួន ភាគតិច Rohingyas នេះក៏ដោយក្តី។
សហគមន៍ Rohingyas ដែលអសបយល់ថាជាជនភាគតិចមួយដែលត្រូវទទួលរងគ្រោះដោយអំពើហិង្សាយ៉ាងខ្លាំងក្លាជាងគេនៅលើលោក ៕ ដោយ នុយ ប៊ែរណាដែត (RFI)
