ក្រសួងព័ត៌មានប្រកាសរៀបចំមហោស្រព តន្ត្រីចម្រៀងសម័យថ្នាក់ជាតិ ឆ្នាំ២០១៣
ភ្មំពេញ៖ សម័យប្រឡងមហោស្រពតន្ត្រី ចម្រៀងសម័យថ្នាក់ជាតិ លើកទីពីរនឹង ប្រព្រឹត្តទៅនៅក្នុង ឆ្នាំ ២០១៣ នេះ បន្ចាប់ពីខកខានរៀបចំកាលពីឆ្នាំ២០១២កន្លងទៅ ដើម្បីជ្រើសរើសអ្នកដែលស្រឡាញ់វិស័យសិល្បៈ ហើយមានបំណងចង់ចូលរួមប្រឡងប្រជែងយកស្នាដៃ ។
លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន បានមានប្រសាសន៍ថា នៅឆ្នាំ២០១៣នេះ ក្រសួងបានបើកមហោស្រពតន្ត្រីថ្នាក់ជាតិ និងមានមហោស្រពតន្ត្រីកុមារមួយទៀត ក្រោយពីបញ្ចប់មហោស្រពតន្ត្រីចម្រៀងសម័យថ្នាក់ជាតិនេះ។
លោករដ្ឋមន្ត្រីបានបន្ថែមថា ព្រឹត្តិការណ៍នេះបង្ហាញពីសក្តានុពលមួយសម្រាប់កាយបំផុសសិល្បករ សិល្បការិនី អ្នកនិពន្ធដែលមិនស្គាល់ និងមិនចេញមុខដើម្បីលើកស្ទួយស្មារតីអ្នកតន្ត្រីចម្រៀងឲ្យមានការ ចម្រើនឡើង។
យោងតាមអ្នករៀបចំកម្មវិធី ការជម្រុះនឹងចាប់ផ្តើមពីថ្ងៃទី២២ ខែមិនា ហើយនិងធ្វើការបញ្ចប់នាអំឡុងដើមខែឧសភា។ ការប្រកួតប្រជែងនេះផ្តោតលើ៥ចំណុច គឺដាក់ពិន្ទុលើបទភ្លេង ទំនុកច្រៀង ការសម្រួលតន្ត្រី ទេពកោសល្យនៃការច្រៀង និងទេពកោសល្យរួម។
ចំពោះបេក្ខជនដែលមានបំណងចង់ចូលរួម ប្រកួតប្រជែងក្នុងមហោស្រព តន្ត្រីចម្រៀងសម័យថ្នាក់ជាតិឆ្នាំ២០១៣នេះ ត្រូវមកចុះឈ្មោះនៅក្រសួងព័ត៌មាន និងអាចដាក់ពាក្យតាមរថយន្តចល័តដែលនឹងធ្វើដំណើរតាមខេត្តក្រុង នានា ឬអាចដាក់ពាក្យតាមក្រសួង មន្ទីរព័ត៌មានតាមបណ្តាខេត្ត និងក្រសួង មន្ទីរវប្បធម៌ និងវិចិត្រសិល្បៈនៅតាមបណ្តាខេត្តក្រុងនានា៕
