សម្ដេចតេជោ បញ្ជាឲ្យតាមចាប់អ្នកបើករថយន្តបុកនិស្សិតស្រីស្លាប់
សារព័ត៌មាន Cambodia News/
ភ្នំពេញ (២៧ មីនា ២០១៩) ៖ ក្នុងពិធីប្រគល់សញ្ញាបត្រដល់គរុសិស្ស-និស្សិតជិត ២ពាន់នាក់ នៅថ្ងៃទី២៧មីនានេះសម្ដេចតេជោ ហ៊ុន សែន នាយករដ្ឋមន្រ្តីនៃកម្ពុជា បានបញ្ជាឲ្យសមត្ថកិច្ច តាមវែកមុខរកអ្នក បើករថយន្តបុកនិស្សិតស្រី នៃសាកលវិទ្យាល័យ ផារ៉ាហ្គន់ ស្លាប់កាលពីថ្ងៃទីម្សិលមិញ។
សម្តេចតេជោបានបញ្ជាក់ថា «ដូចប៉ុន្មានថ្ងៃមកនេះ ឃើញដាក់បញ្ចាំងរឿងរថយន្តបុកនិស្សិតម្នាក់ស្លាប់នឹងត្រូវតែតាមរកឲ្យឃើញ។ ករណីនេះបណ្តាលមកពីអី គឺបណ្តាលមកពីអត់គុណធម៌នឹងឯង»។
សម្តេចបន្តថា បើអ្នកជិះម៉ូតូ ជិះកង់យឺតប៉ុណ្ណាក៏គង់តែលឿនជាងកង់ដែរ ហើយលឿនជាងអ្នកដើរដែរ លើកលែងតែឡាន និងម៉ូតូ តែម៉ូតូខ្លះបានវាលឿនជាឡានមួយសេរី ប៉ុន្តែគេចចុះគេចឡើង បុកផូងនៅក្រោមឡានបាត់រឿងនឹង គឺអីញ្ចឹង ។ សម្តេចក៏បានលើកឡើងថា គ្រោះថ្នាក់ចរាចរណ៍សព្វថ្ងៃនេះបានធ្វើឲ្យប្រជាពលរដ្ឋស្លាប់ច្រើនជាងសម័យសង្គ្រាមទៅទៀត។ សម័យសង្គ្រាមមានថ្ងៃខ្លះអត់មានការប្រយុទ្ធ តែមានអ្នកស្លាប់ និងរបួសដោយសារភ្លើងឆេះផ្ទះ ក្រោយការប្រយុទ្ធ៕
