ការចរចាផ្នែកនយោបាយផ្លាស់ប្តូរតួនាទីសមាជិករដ្ឋសភា អាចកើតមានឡើង
ភ្នំពេញ៖ នៅក្នុងសម័យប្រជុំសភាលើកទី១ នីតិកាលទី៥ នាថ្ងៃទី១០ ខែតុកា នេះ លោក ហេង សំរិន ប្រធានរដ្ឋសភា បានមានប្រសាសន៍ថា ការធ្វើពហិការចូលរួមប្រជុំរបស់តំណាងរាស្ត្រគណបក្សសង្គ្រោះជាតិ គឺជាសិទ្ធិរបស់គណបក្សមួយនេះ។
តែលោកបញ្ជាក់ថា ការសម្របសម្រួលផ្នែកនយោបាយ ពាក់ព័ន្ធនឹងការផ្លាស់ប្តូរតួនាទីសមាជិកក្នុងសភា អាចនឹងកើតមានឡើង ប្រសិនបើតំណាងរាស្ត្រគណបក្សសង្គ្រោះជាតិ ត្រឡប់មកចរចា និងចូលរួមប្រជុំសភាវិញ។
កាលពីថ្ងៃពុធ លោក កឹម សុខា បានបញ្ជាក់ថា ជំហរគណបក្សសង្គ្រោះជាតិ គឺ ទាមទារឲ្យមានតុល្យភាពអំណាចនៅរដ្ឋសភា ដោយសមាសភាពនៃគណៈកម្មាធិការអចិន្ត្រៃយ៍៦ស្មើ ហើយ តំណែងប្រធានរដ្ឋសភា គឺគ្រប់គ្រងដោយគណបក្សសង្គ្រោះជាតិ។
លោក ស ខេ រដ្ឋមន្ត្រីក្រសួងមហាផ្ទៃ បានឲ្យដឹងថា កាលពីថ្ងៃពុធ ប្រធានគណបក្សសង្គ្រោះជាតិ លោកសម រង្ស៊ី បានទូរស័ព្ទមករូបលោក ដោយប្រាប់ថា គណបក្សសង្គ្រោះជាតិ លែងចង់បានតំណែងជាប្រធានរដ្ឋសភាទៀតហើយ តែស្នើសុំតំណែងជាសមាជិកគណៈកម្មាធិការអចិន្ត្រៃយ៍រដ្ឋសភាស្មើគ្នា គឺ ៦រូបម្ខាង។
សំណើររបស់លោក សម រង្ស៊ី ត្រូវបានលោក ស ខេង ច្រានចោល ដោយសារតែវានាំឲ្យជាប់គាំងការសម្រេចកិច្ចការរដ្ឋសភា។ លោក ស ខេង បញ្ជាក់ទៀតថា រដ្ឋសភា អាចប្រជុំទៅបាន ទាល់តែមានសំឡេងគាំទ្រ ៥០ %បូក ១ គឺ ៧ សំឡេង ទល់នឹង៥ សំឡេង។
លោក ស ខេង មានប្រសាសន៍ថា គណបក្ស ប្រជាជនកម្ពុជា នៅតែរក្សាជំហរដដែលដោយផ្តល់ឲ្យគណបក្សសង្គ្រោះជាតិ តំណែងជាអនុប្រធានរដ្ឋ សភា១ ប្រធានគណៈកម្មការជំនាញរដ្ឋសភា ៤ និងអនុប្រធានគណៈកម្មការ៥ ក្នុងចំណោមគណៈកម្មការជំនាញរដ្ឋសភាទាំង ៩។
សមាសភាពប្រធាន អនុប្រធានរដ្ឋសភា ប្រធាន និងអនុប្រធានគណៈកម្មការជំនាញនៃរដ្ឋសភា មាន ចំនួន២១រូប។ បើតាមរូបមន្តគណបក្សប្រជាជនផ្តល់ឲ្យ គណបក្សសង្គ្រោះជាតិ នឹងមានសមាជិក១០រូប ក្នុងចំណោម២១រូប៕ Cambodia News
