អត្រាកុមារខ្វះខាតអាហារូបត្ថម្ភកើនឡើងដោយសារកង្វះទឹកស្អាត និងអនាម័យ
Cambodia News
ភ្នំពេញ៖ ថ្លែងនៅក្នុងឱកាសទិវាទឹក ពិភពលោក នៅថ្ងៃទី២២ ខែមិនា ឆ្នាំ២០១៣នេះ លោកស្រី រ៉ាណា ហ្វ្លាវវ័រ តំណាងអង្គការយូនីសេហ្វ ប្រចាំប្រទេសកម្ពុជា បានមានប្រសាសន៍ថា «ការឆ្លងជំងឺនាំឲ្យកុមារបាត់បង់ចំណង់ក្នុងការញ៉ាំ អាហារ និងធ្វើឲ្យរាងកាយមិនអាចទទួលសារធាតុចិញ្ចឹមគ្រប់គ្រាន់ ដោយសារសារធាតុចិញ្ចឹមអាចត្រូវបានបាត់បង់ ដោយសារជំងឺរាករូស»។
លោកស្រី រ៉ាណា ហ្វ្លាវវ័រ បន្តថា កុមារកម្ពុជា ២៨ ភាគរយ មានទម្ងន់មិនគ្រប់គីឡូ ហើយមានកុមារបួននាក់ ក្នុងចំណោមដប់នាក់ មានបញ្ហាក្រិន។ តាមការសិក្សានានាបានបង្ហាញថា ការមានបង្គន់ និងកាប្រើប្រាស់បង្គន់តាមក្បួនអនាម័យ និងការលាងសំអាតដៃបានត្រឹមត្រូវនឹងកាត់បន្ថយបញ្ហាទម្ងន់មិន គ្រប់គីឡូរបស់កុមារនៅក្នុងប្រទេសនេះ។
ដើម្បីដោះស្រាយនូវបញ្ហានៃការឆ្លងជំងឺ និងកង្វះអាហារូបត្ថម្ភ អង្គការយូនីសេហ្វ សូមអំពាវនាវឱ្យមានការពង្រឹងកិច្ចសហប្រតិបត្ដិការ រវាងក្រសួងអភិវឌ្ឍន៍ជនបទ សុខាភិបាល អប់រំ កសិកម្ម ធនធានទឹក និងរដ្ឋាភិបាលនៅថ្នាក់ក្រោមជាតិ ដើម្បីអាចដោះស្រាយស្ថានភាពនេះតាមបែបផែនក្ដោបរួមលើគ្រប់ ទិដ្ឋភាពទាំងអស់របស់វា៕
