រថយន្ដដឹកអ្នកដំណើររិទ្ធិមុនីបុករ៉ឺម៉កម៉ូតូស្លាប់២នាក់
ភ្នំពេញ៖ កាលពីវេលាម៉ោង២១និង៣០នាទីថ្ងៃទី ៩កុម្ភៈ យុវជន ២នាក់បានបាត់បង់ជីវិតភ្លាមៗនៅ កន្លែងកើតហេតុ រីឯបុរស៣ នាក់ទៀត រួមទាំងអ្នកបើករ៉ឺម៉កម៉ូតូបានរងរបួសធ្ងន់ដោយសាររថយន្ដដឹកអ្នកដំណើរយីហោរិទ្ធិមុនីបុកពីក្រោយ ស្ថិតក្នុងភូមិក្រួស សង្កាត់សំរោង ខណ្ឌសែនសុខ។
យុវជនដែលបាត់បង់ជីវិតក្នុងហេតុការណ៍គ្រោះថ្នាក់ចរាចរណ៍នេះ មានឈ្មោះតុប ជីវ័ន្ដ អាយុ២០ឆ្នាំ និង ឈ្មោះជា សុម៉ាលីន អាយុ១៩ឆ្នាំ មាន ទីលំនៅក្នុងភូមិព្រែកក្ដី ឃុំព្រែកក្ដី ស្រុក ពញាឮ ខេត្ដកណ្ដាល ។ រថយន្ដដឹកអ្នកដំណើរក្រុមហ៊ុនរិទ្ធិមុនីដែលជារថយន្ដបង្កពាក់ ស្លាកលេខ បាត់ដំបង 3A0096 ដឹកអ្នកដំណើរពេញចេញពីភ្នំពេញទៅខេត្ដបាត់ដំបងវេន ពេលយប់។
អ្នករបួសម្នាក់អាចនិយាយ រួចបានឱ្យដឹងថាមុនពេល កើតហេតុ ខ្លួន និងមិត្ដភក្ដិមានគ្នា៥នាក់បាននាំគ្នាចេញ ពីផ្ទះក្នុងគោលបំណងទៅរកស៊ីផឹកនិង ច្រៀងលេងនៅម្ដុំគល់ស្ពានលីយ៉ុងផាត់ តែដោយទីតាំងដែលត្រូវមករកផឹកស៊ី នោះមិនលក់ដូរ ខ្លួននិងមិត្ដភក្ដិបានជិះរ៉ឺម៉កម៉ូតូវិលត្រឡប់ ទៅផ្ទះវិញ ។
ពេលកំពុងធ្វើដំណើរតាមបណ្ដោយផ្លូវជាតិលេខ៥ ក្នុងទិសដៅពីត្បូងទៅជើងដល់ចំណុចកើតហេតុខាង លើក៏ស្រាប់តែមានរថយន្ដដឹកអ្នកដំណើរ រិទ្ធិមុនីដឹកអ្នកដំណើរពេញនេះទៅបុកពី ក្រោយអូសចម្ងាយប្រមាណជាង២០០ ម៉ែត្រ ទើបរថយន្ដនៅឈប់ស្ងៀម ។
សាក្សីនិយាយថា ភ្លាមនោះភាពផ្អើលឆោឡោបានកើតឡើង តៃកុងរថយន្ដបានចុះពីលើរថយន្ដរត់គេចខ្លួនបាត់។ ក្រោយពេលធ្វើការវាស់វែងរួចរាល់ហើយ រថយន្ដដឹកអ្នកដំណើររិទ្ធិមុនី និងរ៉ឺម៉កម៉ូតូត្រូវបានខាងប៉ូលិសចរាចរណ៍ជើងគោករាជធានីភ្នំពេញ យកទៅរក្សាទុករង់ចាំធ្វើការដោះស្រាយ ៕ ហេង នាង
