សម្តេចតេជោ ហ៊ុន សែន ៖ នឹងមិនមានការបន្ដបិទរាជធានីភ្នំពេញ និងតាមបណ្ដាខេត្តទៀតនោះទេ
សារព័ត៌មាន Cambodia News/
ភ្នំពេញ ៖ នៅយប់ថ្ងៃទី០២ ខែឧសភា សម្ដេចតេជោ ហ៊ុន សែន នាយករដ្ឋមន្ត្រីកម្ពុជាបានបញ្ជាក់ឆ្លើយតបទៅនឹងអ្នកខមមិន( Comment) ក្នុងហ្វេសបុកសម្ដេចថា នឹងមិនមានការបន្ដបិទរាជធានីភ្នំពេញ និងតាមបណ្ដាខេត្តទៀតនោះទេ គឺនឹងបើកនៅថ្ងៃទី៦ខែឧសភា តែអាចនឹងបិទតំបន់តូចៗមួយចំនួនដែលមានហានិភ័យខ្ពស់ លើការឆ្លងជំងឺកូវីដ១៩តែប៉ុណ្ណោះ។
ម្ចាស់គណនីហ្វេសបុកឈ្មោះ Tuo បានសរសេរថា «សម្តេចថ្ងៃទី៥នេះ សូមសម្តេចបើកផ្លូវវិញមែនទែនមក។ ក្មួយជាប់នៅខេត្តយូរថ្ងែមកហើយដែរ មិនទាន់ចូលទៅភ្នំពេញវិញបាន ព្រោះត្រូវឡើងមកចាក់វ៉ាក់សាំង ហើយថវិកាក៏ជិតអស់។ សំណាងហើយក្មួយស្គាល់គេៗឲ្យផ្ទះស្នាក់នៅអត់គិតអ្វីពីក្មួយ»។
សម្ដេចតេជោបានសរសេរឆ្លើយតបដោយបញ្ជាក់ថា «ពុំមានហេតុផលបន្តបិទទេ។យើងនឹងបើក តែខេត្ត ឬរាជធានី អាចបិទតំបន់តូចៗ ដែលនៅមានហានិភ័យលើការឆ្លងខ្ពស់។ ការបិទកន្លងមកគឺជាការបង្ខំចិត្តដើម្បីកាត់ បន្ថយការឆ្លងនិងការស្លាប់របស់ប្រជាជនយើង។សូមយោគយល់ដល់ការលំបាករួមរបស់ជាតិ»។
សូមបញ្ជាក់ថា រាជរដ្ឋាភិបាលកម្ពុជា សម្រេចជ្រើសយកវិធានការបន្ដបិទខ្ទប់រាជធានីភ្នំពេញ និងក្រុងតាខ្មៅ ខេត្តកណ្ដាល ដើម្បីទប់ស្កាត់ការឆ្លងរីករាលដាលជំងឺកូវីដ១៩ ហើយការកំណត់បិទខ្ទប់នេះ ត្រឹមថ្ងៃទី០៥ ខែឧសភា ខាងមុខនេះ។ បើគិតដល់ថ្ងៃទី០៥ ខែឧសភា ការបិទខ្ទប់នេះមានរយៈពេល៣សប្ដាហ៍៕
