សម្ដេចតេជោ ជូនពរក្រុមបាល់ទាត់ជំរើសជាតិជប៉ុនឆ្លងផុតឡើងទៅវគ្គចុងក្រោយ
សារព័ត៌មាន Cambodia News/
ក្រុងព្រះសីហនុ ៖ ថ្លែងនៅក្នុងពិធីសម្ភោធចំណតផែពហុបំណងដែលស្ថិតក្នុងកំពង់ផែស្វ័យតក្រុងព្រះសីហនុនាព្រឹកថ្ងៃទី ២៥ ខែ មិថុនា នេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃកម្ពុជា បានជូនពរឲ្យជប៉ុនអាចឆ្លងចូលទៅវគ្គ១៦ ក្រុមចុងក្រោយព្រឹត្តិការណ៍បាល់ទាត់ពិភពលោក FIFA World Cup ២០១៨ ដែលមានរុស្ស៊ីធ្វើជាម្ចាស់ផ្ទះ ។
សម្តេចតេជោ ហ៊ុន សែន បានគូសបញ្ជាក់ថាសម្តេចចាប់យកជប៉ុនតាំងពីចាប់ផ្តើមការប្រកួតមក ព្រោះជប៉ុនជាក្រុមមកពីអាស៊ី ដូច្នេះអាស៊ីត្រូវគាំទ្រអាស៊ី ដោយសម្តេចមានក្តីរំពឹងថា ជប៉ុននឹងឈ្នះប៉ូឡូញឡើងទៅវគ្គ ១៦ ក្រុម ក្នុងការប្រកួតជុំទី៣ បញ្ចប់វគ្គសន្សំពិន្ទុនៃពូល H ដែលនឹងធ្វើការប្រកួតនៅថ្ងៃទី២៨ ខែមិថុនា ឆ្នាំ២០១៨ ស្របពេលសេណេហ្គាល់ ត្រូវជួបកូឡុំប៊ី នៅម៉ោងដំណាលគ្នាដែរ។
ជាមួយគ្នានេះសម្តេចតេជោ ហ៊ុន សែន ក៏បានអំពាវនាវឲ្យប្រជាពលរដ្ឋខ្មែរកុំលេងភ្នាល់បាល់ ក្នុង រដូវប្រកួតបាល់ទាត់ពិភពលោកនេះ ដោយឧទាហរណ៍ជាក់ស្តែងមានប្រជាជននៃប្រទេសខ្លះបានធ្វើអត្តឃាត ព្រោះតែចាញ់បាល់ទាត់នេះ ។ សម្តេចបានអំពាវនាវកុំឲ្យប្រជាជនកម្ពុជាមានហេតុការណ៍កើតឡើង ដោយសារតែការជំពាក់បំណុលក្នុងការចាក់ភ្នាល់បាល់នេះ ៕
