ចេញក្រដាសប្រាក់ “ព្រះបរមរតនកោដ្ឋ” ១០០០រៀលថ្មី
ភ្នំពេញ៖ អនុក្រឹត្យ របស់រាជរដ្ឋាភិបាលកម្ពុជាដែលចុះថ្ងៃទី២៩ ខែមករា ឆ្នាំ២០១៣នេះ បានប្រកាសចេញផ្សាយធនប័ត្រ(ក្រដាសប្រាក់) “ព្រះបរមរតនកោដ្ឋ” ប្រភេទ ១០០០រៀលថ្មីនៅមុនថ្ងៃដង្ហែព្រះបរមសព ប្រមាណ៤ថ្ងៃទៀតនេះ។
ក្នុង អនុក្រឹត្យបានបញ្ជាក់នៅក្នុងមាត្រា១ថា ដោយផ្អែកតាមសំណើរបស់អគ្គទេសាភិបាលនៃធនាគារជាតិនៃកម្ពុជា រាជរដ្ឋាភិបាលកម្ពុជាបានសម្រេច អនុញ្ញាតឲ្យផ្សព្វផ្សាយ ធ្វើចរាចរ និងប្រើប្រាស់ទូទាំងប្រទេសនូវប្រភេទក្រដាសប្រាក់ថ្មីនេះ ទន្ទឹមគ្នានឹងបណ្ដាប្រភេទក្រដាសប្រាក់ចេញផ្សាយរួចហើយ។
មាត្រា២ នៃអនុក្រឹត្យបន្ថែមទៀតថា ធនាគារជាតិនៃកម្ពុជា មានភារកិច្ចចេញសេចក្តីប្រកាសដើម្បីផ្សព្វផ្សាយពីលក្ខណៈ សម្គាល់នៃធនប័ត្រ “ព្រះបរមរតនកោដ្ឋ” ប្រភេទ ១០០០រៀលនេះ។
មាត្រា ៣ នៃអនុក្រឹត្យដដែលនោះបានសង្កត់ធ្ងន់ថា រដ្ឋមន្ត្រីទទួលបន្ទុកទីស្ដីការគណៈរដ្ឋមន្ត្រី អគ្គទេសាភិបាលធនាគារជាតិនៃកម្ពុជា រដ្ឋមន្ត្រី រដ្ឋលេខាធិការគ្រប់ក្រសួង-ស្ថាប័ន និងអភិបាលរាជធានី-ខេត្ត ត្រូវទទួលបន្ទុកអនុវត្តអនុក្រឹត្យនេះតាមភារកិច្ចរៀងៗខ្លួន ចាប់ពីថ្ងៃចុះហត្ថលេខានេះតទៅ៕
