ក្រសួងធនធានទឹក ប្រាប់ឲ្យប្រុងប្រយ័ត្ន ពីជំនន់ទឹកភ្លៀងចាប់ពីថ្ងៃទី១៧ដល់ថ្ងៃទី២០សីហា
សារព័ត៌មាន Cambodia News/
ភ្នំពេញ (១៦ សីហា ២០១៧) ៖ នៅថ្ងៃទី១៦ ខែសីហា នេះ ក្រសួងធនធានទឹកនិងឧតុនិយម បានជូនដំណឹងថា បច្ចុប្បន្ន ជ្រលងសម្ពាធទាប បាននឹងកំពុងបង្កើនឥទ្ធិពលមកលើព្រះរាជាណាចក្រកម្ពុជា ហើយនៅរសៀលថ្ងៃទី១៦ខែសីហាឆ្នាំ២០១៧នេះ នឹងមានសម្ពាធទាបមួយកើតឡើង នៅក្នុងសមុទ្រចិនខាងត្បូង។
សម្ពាធទាបនេះ នឹងធ្វើដំណើរមកដល់ប្រទេសវៀតណាមភាគខាងត្បូង នៅថ្ងៃទី១៧ខែសីហាហើយមានឥទ្ធិពលមកលើព្រះរាជាណាចក្រកម្ពុជា មុននឹងទៅដល់ប្រទេសថៃ នៅថ្ងៃទី១៩ ខែសីហា។
នៅក្នុងសេចក្តីជូនដំណឹង បានបង្ហាញឲ្យឃើញទៀតថា លក្ខណៈអាកាសធាតុបែបនេះធ្វើឲ្យព្រះរាជាណាចក្រកម្ពុជា ចាប់ពីថ្ងៃទី១៧ដល់ថ្ងៃទី២០ខែសីហា សម្រាប់តំបន់ទំនាបកណ្តាល ដែលរួមមានដូចជារាជធានីភ្នំពេញ ខេត្តកណ្តាល ព្រៃវែង ស្វាយរៀង បាត់ដំបង សៀមរាប និងខេត្តបន្ទាយមានជ័យ ផ្ទៃមេឃមានសភាពអាប់អួរ មានពពកច្រើនដេរដាស អាចមានភ្លៀងធ្លាក់ខ្លាំងលាយឡំជាមួយផ្គររន្ទះ។ នៅខេត្តតាកែវ កំពង់ស្ពឺ កំពង់ឆ្នាំង ពោធិសាត់ ប៉ៃលិន និងខេត្តកំពង់ធំ អាចមានភ្លៀងធ្លាក់ ពីមធ្យមទៅបង្គួរ។
ក្នុងសេចក្តីជូនដំណឹង បានបន្ថែមទៀតថា សម្រាប់តំបន់ខ្ពង់រាប ដូចជាខេត្តមណ្ឌលគីរី រតនគីរី ស្ទឹងត្រែង ព្រះវិហារ និង ខេត្តឧត្តរមានជ័យ ផ្ទៃមេឃមានសភាពអាប់អួរ មានពពកច្រើនដេរដាស អាចមានភ្លៀងធ្លាក់ខ្លាំងលាយឡំជាមួយផ្គររន្ទះ។
ឯនៅខេត្តត្បូងឃ្មុំ កំពង់ចាម និងខេត្តក្រចេះ អាចមានភ្លៀងធ្លាក់ពីមធ្យមទៅបង្គួរ។ តំបន់មាត់សមុទ្រ ផ្ទៃមេឃមានសភាពអាប់អួរមានពពកច្រើនដេរដាស មានភ្លៀងធ្លាក់ខ្លាំងលាយឡំជាមួយនឹងផ្គររន្ទះ។ រលកសមុទ្រមានកម្ពស់ខ្ពស់ៗ។
នៅក្នុងសេចក្តីជូនដំណឹង ក៏បានអំពាវនាវឲ្យមានការប្រុងប្រយ័ត្នចំពោះជំនន់ទឹកភ្លៀង ដែលអាចនឹងកើតមានឡើង ពិសេសចំពោះបងប្អូនប្រជានេសាទសមុទ្រនិងអ្នកធ្វើដំណើរតាមសមុទ្រ សូមបង្កើនការយកចិត្តទុកដាក់ប្រុងប្រយ័ត្នខ្ពស់ ដើម្បីចៀសវាងនូវគ្រោះថ្នាក់ផ្សេងៗ ដែលអាចកើតមានឡើងជាយថាហេតុ៕
