សមត្ថកិច្ចឃាត់ខ្លួនក្មេងស្ទាវវាយតប់គ្នា ៥នាក់ និងសន្តិសុខយាមនៅក្លឹបវើលដាន់ម្នាក់
ភ្នំពេញ ៖ កាលពីវេលាម៉ោង១និង៣០នាទីរំលងអធ្រាត្រ ឈានចូលថ្ងៃទី១៦ ខែមករា ក្រុមក្មេងស្ទាវ២ក្រុមបានចូលទៅផឹកស៊ីនៅក្នុងក្លឹបវើលដាន់ ស្ថិតនៅ តាមបណ្តោយផ្លូវ២៧១ ក្នុងសង្កាត់ទឹកល្អក់៣ ខណ្ឌទួលគោក ពួកគេបានវាយតប់គ្នាបង្កឲ្យមាន ការឆោឡោដល់សមត្ថកិច្ចចុះមកអន្តរាគមន៍ឃាត់ខ្លួនក្មេងស្ទាវចំនួន៥ នាក់ និងសន្តិសុខយាមនៅក្លឹបវើលដាន់ម្នាក់។
តាមសេចក្តីរាយការណ៍ពីកន្លែងកើតហេតុបានឲ្យដឹងថា មុនពេលកើតហេតុក្មេងស្ទាវ២ក្រុមមានគ្នាប្រមាណជិត២០នាក់ បានចូលទៅផឹកស៊ីនៅក្នុងក្លឹបវើលដាន់ រហូតដល់ពេលដែលពួកគេស្រវឹងស្រាហើយនោះ ពួកគេបាននិយាយពាក្យឌឺដងដាក់គ្នា ទាល់តែភាគីម្ខាងទ្រាំមិនបានក៏ដេញវាយតប់គ្នានៅក្លឹបបង្កឲ្យ មានការភ្ញាក់ផ្អើល ពេញក្លឹប ដល់អ្នករាំដែលនៅក្នុងនោះផងដែរ។
ភ្លាមៗនោះ ក្រុមសន្តិសុខក្លឹបវើលដាន់ ប្រមាណ៦ទៅ៧នាក់ព្រួតគ្នាវាយអូសក្រុមក្មេងស្ទាវទាំងនោះចេញទៅក្រៅ ក្លឹប ក៏បង្កឲ្យមានអ្នក រងរបួសប៉ោងមុខប៉ោងមាត់ថែមទៀត៕
