រថយន្តបែកកង់រេចង្កូតបុករនាំងដែកចែកទ្រូងផ្លូវបាក់អស់៤ផ្ទាំង
ភ្នំពេញ៖ កាលវេលាម៉ោង៧និង៥នាទីយប់ ថ្ងៃទី១៤ ខែមករា រថយន្តកូរ៉ូឡាមួយគ្រឿងបានបែកកង់មុខ ខណៈពេលដែលកំពុងតែធ្វើចរាចរណ៍តាមដងវិថីក៏បួងចង្កូតមិនទាន់ ជ្រុលទៅបុករនាំងដែក ពុះចែកទ្រូងផ្លូវ បណ្តាលឲ្យបាក់អស់ចំនួន៤ផ្ទាំង នៅមុខធនាគា អេស៊ីលីដា តាមបណ្តោយមហាវិថីសហព័ន្ឋរុស្ស៊ី ក្នុងសង្កាត់កាកាប ខណ្ឌពោធិ៍សែនជ័យ។
សាក្សីនៅកន្លែងកើតហេតុបានឲ្យដឹងថា មុនពេលកើតហេតុរថយន្តកូរ៉ូឡា បើកបរដោយបុរសម្នាក់ តាមបណ្តោយមហាវិថីសហព័ន្ឋរុស្ស៊ី ពីលិចទៅកើត ទើបតែចេញពីធ្វើការ នៅក្នុងប្រលានយន្តហោះអន្តរជាតិ ស្រាប់តែមកដល់ចំណុចកើតហេតុខាងលើ រថយន្តបាន បែកកង់មុខខាងស្តាំ រួចក៏បួងចង្កូតគេចពីម៉ូតូ ជ្រុលទៅបុករនាំងដែកពុះចែកទ្រូងផ្លូវ បណ្តាល ឲ្យបាក់អស់៤ផ្ទាំង តែមិនបណ្តាលឲ្យ មនុស្សណាម្នាក់រងរបួសទេ។
ក្រោយពេលកើតហេតុរថយន្តបង្កត្រូវបានប៉ូលិសនគរបាលចរាចរចុះទៅវាស់វែង រួចនាំយកទៅរក្សាទុកនៅការិយាល័យចរាចររាជធានីភ្នំពេញដើម្បីដោះស្រាយ ៕
